Aýyldaǵy dárigerlerge 8,5 mln teńgege deıin tólem usynǵan TOP–5 óńir belgili boldy

ASTANA. KAZINFORM – Qazaqstanda medıtsına qyzmetkerlerin qoldaý sharalary keńeıip keledi. 2025 jyldyń 10 aıynda áleýmettik qoldaýmen 1 326 dáriger, onyń ishinde 801 maman aýyldyq aımaqtarda qamtylǵan, dep habarlaıdy Densaýlyq saqtaý mınıstrligi.

Mınıstrliktiń málimetinshe, kadr tapshylyǵy anyq seziletin eldi mekenderge mamandardy tartý maqsatynda óńirler joǵary kólemdegi áleýmettik tólemder usynyp otyr. Solardyń ishinde aýyldyq jerlerge barýǵa yntalandyrý sharalaryn eń joǵary deńgeıde engizgen TOP-5 óńir anyqtaldy.

Batys Qazaqstan, Shyǵys Qazaqstan, Pavlodar, Almaty jáne Atyraý oblystarynda dárigerlerdi jumysqa ornalastyrý kezinde beriletin áleýmettik qoldaý mólsheri 8,5 mln teńgege deıin jetedi.

Vedomstvo sondaı-aq Jetisý oblysynyń tájirıbesin atap ótti. Bul óńirde aýylǵa kelgen dárigerlerge 10 mln teńgege deıin kóterme járdemaqy beriledi. Mınıstrliktiń dereginshe, atalǵan qoldaý sharasy óńirdegi kadr turaqtylyǵyn aıtarlyqtaı arttyrǵan.

Mınıstrlik 2025 jylǵy qańtar-qazan aılaryndaǵy negizgi nátıjelerdi jarııalady:

– 417 jas maman oqý bitirgennen keıin birden jumysqa ornalasty;
– 287 dáriger respýblıkalyq bıýdjetten kóterme járdemaqy aldy;
– 866 maman jergilikti bıýdjet esebinen qoldaý aldy, onyń ishinde 248 – tapshy mamandyq boıynsha;
– medıtsınalyq uıymdar tarapynan 106 dárigerge tólem berildi;
– 571 maman baspanamen qamtamasyz etildi;
– 116 dáriger qosymsha áleýmettik qoldaý aldy.

Densaýlyq saqtaý mınıstrligi dárigerlerdiń eńbek jáne turmys jaǵdaıyn jaqsartý – aýyldyq eldi mekenderde medıtsınalyq kómektiń qoljetimdiligin arttyrýdyń, sondaı-aq densaýlyq saqtaý júıesiniń bastapqy býynyn nyǵaıtýdyń basty sharty ekenin atap ótti.

Aıta keteıik, qazaqstandyq dárigerler Aýǵanstandaǵy mıssııadan oraldy.