Aýyldaǵy aǵaıynǵa tegin kómek: 500-den asa adam tegin medıtsınalyq kómek aldy
ASTANA. KAZINFORM — Qazaqstanda dárigerler men stýdentterdiń qatysýymen medıtsınalyq volonterlik damyp keledi, dep habarlaıdy Mádenıet jáne aqparat mınıstrliginiń baspasóz qyzmeti.
Mádenıet jáne aqparat mınıstrliginiń tapsyrysy boıynsha «Azamattyq bastamalardy qoldaý ortalyǵy» KEAQ uıymdastyrýymen shaǵyn granttar aıasyndaǵy «Kúmis dárigerler — qamqorlyq pen tájirıbe» jáne «Jurekke Shipa: bilim men izgilik kópiri» jobalary aıaqtaldy.
— Almaty oblysynda «Kúmis dárigerler — qamqorlyq pen tájirıbe» jobasyna 22 tájirıbeli dáriger qatysty. Bastama shalǵaı eldi meken turǵyndaryna kóp jyldyq tájirıbesi bar mamandardan bilikti medıtsınalyq kómek alýǵa baǵyttalǵan. Joba aıasynda dárigerlerge bastapqy tekserýge qajetti quraldarmen jabdyqtalǵan arnaıy «volonter sómkeleri» tabystaldy. Nátıjesinde aýyldyq jerlerde turatyn 500-den astam adam tegin medıtsınalyq kómek aldy, — delingen habarlamada.
Tájirıbeli dárigerler aýyldaǵy aýrýhanalarda eńbek etetin jas áriptesterine tálimgerlik qoldaý kórsetti. Olar kásibı bilimin bólisip, naýqastardy emdeýdiń kóp jylǵy tájirıbede qalyptasqan ádis-tásilderin úıretti.
Astanada medıtsına stýdentterin volonterlikke tartýǵa baǵyttalǵan «Jurekke Shipa: bilim men izgilik kópiri» jobasy aıaqtaldy.
Bastamaǵa 200 adam qosyldy. Olar elordadaǵy qarttar men múgedektigi bar adamdarǵa arnalǵan pansıonat turǵyndarynyń densaýlyǵyn baqylaýǵa kómektesti. Joba bolashaq medıtsına mamandarynyń alǵan bilimin is júzinde qoldanýyna, kásibı daǵdylaryn jetildirýine jáne volonterlik jumysqa aralasýyna múmkindik berdi.
Osyǵan deıin Qazaqstan volonterlik boıynsha 34 kelisim jasasqanyn jazǵanbyz.
