Aýylda jumys isteıtin sý salasy mamandaryna 7,8 mln teńgege deıin járdemaqy beriledi

ASTANA. KAZINFORM — Elimizde sý salasy mamandaryna kórsetiletin áleýmettik qoldaý sharalary artty. Bul týraly Sý resýrstary jáne ırrıgatsııa mınıstrligi ǵylym jáne ınnovatsııalar departamentiniń dırektory Lázzat Júsipova málim etti.

— Jumysshy mamandyqtary jyly aıasynda nesıelik baǵdarlama boıynsha sý salasynyń mamandaryna tıimdi sharttarmen baspana alýǵa múmkindik berildi. Odan bólek, sektordy damytýǵa eleýli úles qosqan qyzmetkerlerge, gıdrotehnıkterge, melıoratorlarǵa «Qazaqstannyń sý sharýashylyǵy salasynyń eńbek sińirgen qaıratkeri» degen ataq beriledi, — dedi Lázzat Júsipova ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq mınıstrlik ókiliniń málimdeýinshe, sý salasy mamandarynyń «Dıplommen aýylǵa» memlekettik baǵdarlamasyn paıdalaný múmkindigi bar.

— Sondaı-aq aýylǵa jumys isteý jáne turý úshin kelgen agroónerkásiptik keshen salasyndaǵy mamandardy áleýmettik qoldaý úshin kóterme járdemaqy bıýdjettik nesıe 7,8 mln teńgege deıin ósti, — deıdi spıker.

Buǵan deıin brıfıng barysynda nelikten Qazaqstan kórshi eldermen sý máselesin sheshe almaı otyr degen másele kóterilgen edi.