Aýylda bar jaǵdaı jasalǵan: Prezıdentpen kezdesken jas maman
Barlyǵy birdeı aýyldan ketse, babamyzdan qalǵan berekege kim ıe bolmaq!? Mundaı oıyn «Shaǵan jer» JShS-nyń jas mehanızatory Aıbek Ýálıev Qyzylordada Prezıdent Qasym-Jomart Toqaevpen kezdesýde aıtty, dep habarlaıdy Kazinform agenttiginiń tilshisi.
Búgin Memleket basshysy óńirge sapary barysynda «Eńbek alleıasynda» eńbek adamdarymen kezdeskenin jazǵan bolatynbyz. Júzdesýdiń vıdeosy Aqorda-nyń Telegram arnasynda jarııalandy.
«Shaǵan jer» JShS mehanızatory Aıbek Ýálıev aýylda eńbek etýdiń artyqshylyqtaryn aıtyp ótti.
«Atam da, ákem de osy sharýashylyqta qyzmet atqarǵan. Men de solardyń izimen erip, qazir aýylda qalyp, eńbek etip júrmin. Búginde jastardyń kóbi aýyldan jyraqqa ketip, tabysty syrttan tapqysy keledi. Biraq, barlyǵy birdeı aýyldan ketse, babamyzdan qalǵan berekege kim ıe bolmaq!? Onyń ústine qazir aýylymyzda jaǵdaı jasalǵan. Aýyzsý 24 saǵat aǵyp tur. Mektep, aýrýhana, balabaqsha bári bar. Jumys isteımin degen adamǵa jumys kózi de tabylady», – dedi Aıbek Ýálıev.
Prezıdent óz sózinde jastarǵa kóńil bólý qajettigin atap aıtty.
«Men ár ýaqytta da jastar týraly aıtyp kelemin. Jastarymyz – elimizdiń bolashaǵy. Jastarymyz eńbekqor, uqypty, otansúıgish bolýy kerek. Jastarymyz óte jaqsy. Sen sııaqty jastarymyzdy árqashan da qoldaımyn. Aýylda (Syrdarııa aýdany Naǵı Іlııasov aýyly) ómir súrýge, jumys isteýge jaǵdaı jasalǵan eken. Osyndaı aýyldardy kóbeıtýmiz kerek. Shamamyz bar, qarajat jetedi. Qaltaly azamattarǵa, kásipkerlerge aýyldarǵa kómektesý qajettigin qaıta-qaıta aıtyp jatyrmyn», – dedi Qasym-Jomart Toqaev.
Sondaı-aq júzdesýde «Aqmaıa» sharýa qojalyǵynyń brıgadıri Gúlsim Dáribaeva óziniń eńbek joly týraly málim etti.
«Shıeli aýdany Aqmaıa aýylyndaǵy «Aqmaıa» sharýa qojalyǵynda 40 jyldan beri aýyl sharýashylyǵy salasynda eńbek etemin. Eńbek jolymdy qarapaıym qol jumysymen bastap, keıin traktor, kombaın aıdadym, agronom-esepshi boldym. Qazirgi tańda kúrish brıgadasynda brıgadır bolyp jumys isteımin. Dala akademıgi Ybyraı Jaqaev atamyz «Eńbektiń kózin tapqan, baılyqtyń ózin tabady» degen eken. Mine, sol eńbektiń arqasynda talaı jetistikterge jettim», – dedi ol.
Memleket basshysy osy oraıda, eń aldymen, eńbek adamdaryn syılaý qajettigin atady.
Eske salaıyq, búgin tańerteń Memleket basshysy Qyzylorda oblysyna jumys saparymen bardy.
Qasym-Jomart Toqaevtyń óńirge sapary Syrdarııa aýdany Naǵı Іlııasov aýylynyń tynys-tirshiligimen tanysýdan bastaldy.
Odan ári Prezıdent byltyr boı kótergen «Eńbek alleıasynda» eńbek adamdarymen júzdesti.
Sondaı-aq «Qyzylorda – Jezqazǵan» avtojolyn salý barysy týraly málimet berildi.
