Aýyl turǵyndarynyń tutynýshylyq quqyǵy qalaı qorǵalyp jatyr

ASTANA. KAZINFORM – Aýyldaǵy aǵaıyndardyń tutynýshylyq quqyǵy tıisti deńgeıde qorǵalyp jatyr ma? Bul saýalǵa Saýda jáne ıntegratsııa mınıstrligi tutynýshylardyń quqyǵyn qorǵaý komıtetiniń ókili jaýap berdi.

- Árıne, aýyl turǵyndaryna túsindirý jumystaryn júrgizip jatyrmyz. Ózim jaqynda óńirden keldim, biz mindetti túrde aýyl ákimdikterimen birlesip kem degende aptasyna bir ret túsindirme jumystaryn júrgizemiz. Búkil saýda oryndaryn aralap, talaptardyń qalaı oryndalyp jatqanyn qarap shyǵamyz. Maqsat – shara qoldaný emes, satýshyǵa zań talaptaryn túsindirý. Sebebi satýshy zań talaptaryn bilse, tutynýshy quqyǵyn buzýǵa barmaıdy, - dedi Saýda jáne ıntegratsııa mınıstrligi tutynýshylardyń quqyǵyn qorǵaý komıteti memlekettik saıasatty qalyptastyrý basqarmasynyń basshysy Erkebulan Taǵashev ortalyq kommýnıkatsııalar qyzmeti alańynda ótken baspasóz máslıhatynda.

Odan bólek, tutynýshylardyń quqyǵyn qorǵaý komıteti ókiliniń málimdeýinshe, aýdandyq gazette aıyna bir ret tutynýshylardyń quqyǵy týraly túsindirme is-sharalar jónindegi aqparat shyǵý turýy tıis degen usynys berilgen.

Buǵan deıin Saýda jáne ıntegratsııa mınıstrliginiń mamany «Taýardyń jarnamadaǵy baǵasy men dúkendegi baǵasy arasynda aıyrmashylyq bolsa, ne isteý kerek?» degen saýalǵa jaýap bergen bolatyn.

Aıta keteıik, jyl basynan beri 2,2 mlrd teńgege tutynýshylardyń quqyǵy qorǵaldy.