Aýyl turǵyndarynyń tsıfrlyq servısterdi qoldanýy artyp keledi – Tsıfrlyq damý mınıstri

E-Otinish platformasy «jasyryn» qyzmetterdi anyqtaýǵa múmkindik berdi. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy Kazinform.

«E-Otinish platformasy «jasyryn» qyzmetterdi anyqtaýǵa múmkindik berdi. Tek bıyldyń ózinde 200 jasyryn qyzmet anyqtalyp, olardy memlekettik qyzmetter tizimine engizip jatyrmyz», - dedi mınıstr.

Sonymen qatar ol shalǵaı aýylda turatyn halyqqa sapaly memlekettik qyzmet kórsetý de mańyzdy máselerdiń biri ekendigine toqtaldy.

«Jalpy, aýyl turǵyndarynyń tsıfrlyq servısterdi qoldanýy jyl saıyn ósip keledi. Degenmen, problemalar bar. Sondyqtan aýyl turǵyndaryna qolaıly jaǵdaı jasaý úshin biz Qazposhtamen birge 200 aýylda jergilikti bólimsheler arqyly memlekettik qyzmetti kórsetýdi qolǵa aldyq. Búkil aýyldardy osyndaı qyzmetpen qamtý úshin Samruq-Qazyna jáne Qazposhta kompanııalary aýyldyq poshta bólimshelerin jóndep, jaǵdaı jasasa degen ótinish bar», - dedi Baǵdat Mýsın.