Aýyl turǵyndarynyń ómir súrý sapasyn jaqsartý úshin ne istelip jatyr
ASTANA. KAZINFORM – Bıyl 500-den astam aýylda 1,4 myń joba iske asyrylady. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Jalpy aýyl turǵyndarynyń ómir súrý sapasyn jaqsartý jáne Óńirlik standarttarmen qamtamasyz etý deńgeıin arttyrý úshin mınıstrlik múddeli memlekettik organdarmen jáne ákimdiktermen birlesip, birqatar júıeli is-shara qabyldaýda. Memleket basshysynyń Jarlyǵyna sáıkes Úkimet Qazaqstan Respýblıkasynyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasyn qabyldady jáne iske asyrýda. Tujyrymdama aýyldyq aýmaqtardyń geografııalyq erekshelikteri men básekelestik artyqshylyqtaryn eskere otyryp, olardyń áleýmettik-ekonomıkalyq áleýetin ashýǵa baǵyttalǵan. Tujyrymdamada bazalyq qyzmetter kórsetýdegi dısproportsııalardy qysqartý, aýyl halqynyń tabys deńgeıin arttyrý, shekara mańyndaǵy aýmaqtardy damytý jáne aýyldardy damytýǵa baǵyttalǵan sharalar keshenin júıeleý jónindegi negizgi baǵyttar aıqyndalǵan», - dedi mınıstr.
Nurlan Baıbazarovtyń aıtýynsha, 2023 jyly ortalyq jáne jergilikti atqarýshy organdar tujyrymdamany júzege asyrý jónindegi is-qımyl josparyna sáıkes keshendi sharalardy iske asyrdy. Máselen, «Aýyl - el besigi» baǵdarlamasy aıasynda 194 mlrd teńge somasyna 771 aýylda 1,8 myń joba iske asyryldy. Budan bólek 113 mlrd teńgege 4,9 myń sýmen jabdyqtaý jáne sý burý obektileri salyndy, 85 alǵashqy medıtsınalyq-sanıtarlyq kómek obektileri quryldy. 176 aýyl Wi-Fi hotspot tehnologııasyna qosyldy jáne Starlink spýtnıktik júıesin paıdalana otyryp, shalǵaıdaǵy aýyldyq mektepterdi ınternetke qosý boıynsha pılottyq joba bastaldy. «Aýyl amanaty» jobasy aıasynda 79 mlrd teńgege 12,7 myń jeńildetilgen shaǵyn nesıe berildi.
«Oblystardyń ereksheligine sáıkes aýyldyq aýmaqtardy damytý boıynsha jol kartalary bekitildi. Aýyldyq jerge jas mamandardy tartý maqsatynda «Dıplommen aýylǵa» jobasy boıynsha bıýdjettik kredıt mólsheri 1 500-den 2 500 aılyq eseptik kórsetkishke deıin ulǵaıdy jáne basqa da is-sharalar iske asyryldy. Aýyldyq jerlerde ınfraqurylymdyq máselelerdi sheshý jónindegi basty quraldardyń biri «Aýyl – el besigi» baǵdarlamasyn iske asyrý bolyp tabylady. 2019-2023 jyldary respýblıkalyq bıýdjetten jalpy baǵdarlama boıynsha 524 mlrd teńge bólinip, 1,8 myń tirek jáne spýtnıktik aýyldarda 5,4 myńnan astam joba iske asyryldy. Bul turǵyn úı-kommýnaldyq sharýashylyq salasyndaǵy 578 nysandy, 1,7 myń áleýmettik nysandy jáne 3 myńnan astam aýylishilik joldardy salýǵa jáne jóndeýge múmkindik berdi. Baǵdarlama boıynsha bıyl respýblıkalyq bıýdjetten 179 mlrd teńge bólinip, 500-den astam aýylda 1,4 myń jobany iske asyrý josparlanýda», - dedi Nurlan Baıbazarov.
