Aýyl turǵyndaryna «taýar nesıesin» berý máselesin qarastyrylady – Joldaý
ASTANA. KAZINFORM – Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda keıbir jer ıelenýshiler telim ornalasqan eldi mekenge qamqorlyq jasamaıtynyn synady.
«Kóptegen menshik ıesi ózderi paıdasyn kórip otyrǵan jerden myńdaǵan shaqyrym alysta turady, ondaǵy aýyl turǵyndaryna qamqorlyq jasaý oıyna kirip te shyqpaıdy. Bizge mundaı jer ıeleriniń qajeti joq. Úkimet pen Bas prokýratýra olarǵa qatysty máseleni myqtap qolǵa alýǵa tıis. Azamattar, ásirese, aýyl turǵyndary zańdy túrde tabysty jumys istep, bolashaǵynyń qamyn ózi oılaýy kerek. Olardy osyǵan yntalandyrý – memlekettiń basty mindetteriniń biri», - dedi Qasym-Jomart Toqaev.
Memleket basshysy byltyr bastalǵan «Aýyl amanaty» jobasy nátıjesine «jaman emes» degen baǵa berdi.
«Endi osy joba aıasynda taǵy bir jańa tásildi, ıaǵnı «taýar nesıesin» berý máselesin qarastyrý qajet. Aýyl turǵyndaryna óz ónimderin óńdeýge jáne satýǵa múmkindik beretin ınfraqurylym qurý óte mańyzdy. Ár aýdanda azamattarǵa túrli aýyl sharýashylyǵy daqyldaryn ósirýdi úıretetin ortalyq ashý qajet. Osyndaı joba «Amanat» partııasynyń bastamasymen Jambyl oblysy Merki aýdanynda júzege asyryldy. Úkimet pen ákimder bul tájirıbeni basqa da aımaqtarǵa taratýdy oılastyrýy kerek. Jalpy otandyq bızneske jáne shetel ınvestorlaryna jol ashý – Úkimet pen barlyq memlekettik organnyń mindeti. Al olardyń, ıaǵnı bıznestiń jáne ınvestorlardyń zańdy qyzmetine kedergi jasaý asa aýyr quqyq buzýshylyq dep sanalýǵa tıis. Demek ondaı áreketke jol bergender tıisti jazasyn alady. Men bul týraly únemi aıtyp júrmin. Al kásipkerler men ınvestorlar óz jumysyn adal júrgizip, zańdy saqtap, salyq tóleýden jaltarmaýy kerek», - dedi Prezıdent.
