Aýyl turǵyndaryna arnalǵan ıpotekalyq baǵdarlama ázirleý usynyldy

ASTANA. KAZINFORM — Májilis depýtaty Erlan Saıyrov Úkimetke aýyl, aýdan turǵyndary úshin tómendetilgen mólsherlemesi 5%-ǵa deıin jáne eń tómengi bastapqy jarnasy 10%-dan bastalatyn jeńil ıpotekalyq baǵdarlama ázirleýdi usyndy. 

— Qazaqstan halqyna Joldaýynda Prezıdent Qasym-Jomart Toqaev «Otbasy banktiń qyzmetin qaıta qaraý kerektigin aıtyp, basty nazardy oblys ortalyqtaryna emes, aýdandarǵa, monoqalalarǵa jáne aýyldarǵa aýdarǵan jón» dep naqty baǵdar berdi. Búginde aýyldarda, aýdandar men monoqalalarda 8,7 mln adam turady, bul Qazaqstan halqynyń 43%-yn quraıdy. Al turǵyn úımen qamtamasyz etý deńgeıi qalalarda 26,9 sharshy metr bolsa, aýyldarda bir adamǵa shaqqanda nebári 20,7 sharshy metr, — dedi Erlan Saıyrov Úkimet basshysynyń orynbasary Serik Jumanǵarınniń atyna depýtattyq saýal joldaı otyryp.

Halyq qalaýlysy keltirgen málimetke súıensek, jyl basynda aýyldarda 9 myńnan astam adam turatyn 1200 avarııalyq úı, monoqalalarda 2,3 myń adam turatyn 76 avarııalyq úı boldy. 2022-2024 jyldary jańa turǵyn úıdiń tek 20%-y aýyldyq jerlerde paıdalanýǵa berildi.

— Mundaı dısproportsııa, eń aldymen, aýyl turǵyndary úshin ıpotekalyq, Otbasy banki ónimderiniń qoljetimsizdigimen jáne halyqtyń habardar bolýy deńgeıiniń tómen bolýyna baılanysty. Otbasy banktiń konsýltatsııalyq ortalyqtary tek 4 monoqalada jáne 5 shaǵyn qalada jumys isteıdi, aýyldar men aýdandardyń kóp bóliginde múldem jumys istemeıdi. Byltyr Otbasy banki bastapqy jáne qaıtalama turǵyn úı satyp alýǵa, sondaı-aq aýyldarda jeke turǵyn úıler salýǵa qoljetimdi qarjylandyrýdy usynatyn «Asyl meken» pılottyq baǵdarlamasyn iske qosty, — dedi Erlan Saıyrov

Onyń málimdeýinshe, Otbasy banki joǵaryda atalǵan pılottyq baǵdarlamany iske asyrýǵa óz qarajatynan 2 mlrd teńge bóldi. «Otaý» jáne «Naýryz» baǵdarlamalary boıynsha kezekte turǵandar men ótinish berýshilerge qatysýǵa basymdyq berildi. Qaryzdyń eń joǵary somasy 10 mln teńgeni quraıdy. Alaıda baǵdarlama tıimdiligi bolǵanyna qaramastan jalǵasyn tappaı, qarjylandyrý toqtatyldy.

Osylaısha Májilis depýtaty Úkimet kelesi sharalardy qabyldaýy qajet dep esepteıdi:

1. «Asyl meken» baǵdarlamasyn qarjylandyrýdy ulǵaıtý. Shaǵyn qalalardy qamtı otyryp, baǵdarlamanyń búkil el aýmaǵynda turaqty iske asyrylýyn qamtamasyz etip, respýblıkalyq bıýdjetten jyl saıyn qarajat bólýdi kózdeý;

2. Aýylǵa beıimdelgen ıpotekalyq ónimderdi ázirleý. Aýyldar, monoqalalar jáne shaǵyn qalalar turǵyndary úshin tómendetilgen mólsherlemesi 5%-ǵa deıin jáne eń tómengi bastapqy jarnasy 10%-dan bastap jeńildikti ıpotekalyq ónimder jasaý. Halyqtyń áleýmettik jaǵynan osal sanattar úshin mólsherlemelerdi sýbsıdııalaýdy qamtamasyz etý;

3. Jergilikti atqarýshy organdarmen úılestirýdi kúsheıtý. Shyǵys Qazaqstan oblysyndaǵy «Bir qabatty Shyǵys» jáne Jetisý oblysyndaǵy «Jeruıyq» jobalarynyń tabysty tájirıbesin paıdalana otyryp, baǵdarlamalardy birlesip iske asyrý úshin ákimdiktermen kelisimder jasasý;

4. Otbasy banki konsýltatsııalyq jáne aqparattyq servısteriniń geografııasyn keńeıtý. Ár aýdanda qyzmet kórsetý ortalyqtaryn ashý, mobıldi ofıster ashý, búkil el boıynsha aqparattyq-aǵartý naýqandaryn bastaý. Otbasy banktiń qyzmetin qaıta qaraý Qazaqstannyń ádiletti, teńgerimdi jáne qol jetimdi bolashaǵyna jasalǵan qadam.

Buǵan deıin Májilis depýtaty Nartaı Sársenǵalıev halyqty jumyspen qamtýǵa bólingen qarajat maqsatsyz jumsalyp jatqanyn aıtyp, Úkimetke dabyl qaqty.