Aýyl turǵyndary jalǵa beriletin turǵyn úıdi ózderi tańdaı alady
ASTANA. KAZINFORM – Qazaqstanda aýyldyq eldi mekenderde jalǵa beriletin turǵyn úıdi usyný tártibi ózgeredi.
31 tamyzdan bastap turǵyn úıge muqtaj retinde turǵan azamattar óz aýdanynyń aýmaǵynan qolaıly jaldamaly turǵyn úıdi ózderi tańdap, ony alý úshin ótinish bere alady.
Bul jergilikti atqarýshy organdar memlekettik bıýdjet qarajaty esebinen salǵan nemese satyp alǵan turǵyn úılerge qatysty.
Jańa tetik boıynsha ótinishterdi alǵashqy qabyldaý 2026 jylǵy 1–7 qyrkúıek aralyǵynda baspana.otbasybank.kz portalynda ótedi. Ótinishti tıisti aýdanda turǵyn úıge muqtaj retinde turǵan azamattar bere alady. Ótinish berý úshin qoldanystaǵy elektrondyq tsıfrlyq qoltańba qajet.
— Ótinishterdi qabyldaý aıaqtalǵannan keıin Otbasy bank turǵyn úı alýshylardyń tizimin qalyptastyrady. Turǵyn úıdi bólý kezinde esepke qoıylǵan kúni, otbasynyń sońǵy alty aıdaǵy tabys deńgeıi, otbasy quramy jáne ótinish berýshiniń áleýmettik mártebesi eskeriledi.
Sonymen qatar, qaǵıdalarda azamattardyń jekelegen sanattaryna basymdyq berý kózdelgen. Memlekettik turǵyn úıdiń keminde 20%-y jetim balalar men ata-anasynyń qamqorlyǵynsyz qalǵan balalarǵa bólinedi. Taǵy keminde 50%-y áleýmettik osal sanattarǵa jatatyn azamattardyń jekelegen toptaryna qarastyrylǵan, — delingen Qurylys jáne turǵyn úı-kommýnaldyq sharýashylyq isteri komıteti habarlamasynda.
Taǵy bir ózgeris kezekte turǵan azamattarǵa beriletin turǵyn úıdi aıqyndaý sharttaryna qatysty. Bul norma 2026 jylǵy 14 qyrkúıekten bastap qoldanysqa engiziledi. Turǵyn úıdegi bólmeler sanyn aıqyndaý kezinde otbasy quramy eskeriledi. Atap aıtqanda, erli-zaıyptylar men ata-analarǵa, sondaı-aq ártúrli jynystaǵy balalarǵa jeke bólme berý talaptary qarastyrylǵan.
Aldaǵy ýaqytta bul tártip turaqty negizde qoldanylady. Tıisti aýdannyń aýyldyq eldi mekenderinde qoljetimdi jaldamaly turǵyn úı paıda bolǵan saıyn, turǵyn úıge muqtaj retinde turǵan azamattar ony ózderi tańdap, alýǵa ótinish bere alady.
Aıta ketelik baspanada 50%-ǵa deıin úlesi bar azamattar memlekettik turǵyn úıdi jekeshelendire alatyny týraly jazǵan edik.
