Aýyl turǵyndary úshin baspana alý tártibi ózgeredi — Otbasy bank
ASTANA. KAZINFORM — «Otbasy bank» ulttyq damý ınstıtýty retinde turǵyn úıge muqtaj azamattardy baspanamen qamtý baǵytyndaǵy jumysyn jalǵastyryp keledi. Búginde bank arqyly 15511 jaldamaly páter bólinip, myńdaǵan otbasy jaıly baspanaǵa qol jetkizdi.
Turǵyn úıdi bólý úderisiniń ashyq ári tıimdi júrgizilýine jańa tsıfrlyq júıe kómektesip otyr. Jergilikti ákimdikterden Otbasy bankke berilgen jaldamaly jáne nesıelik turǵyn úıler «Turǵyn úımen qamtamasyz etý ortalyǵy» arqyly bólinedi. Úderisti avtomattandyrýdyń nátıjesinde bir jylda turǵyn úıdi bólý qarqyny úsh esege artqan. Bul turǵyn úıge muqtaj azamattardyń ótinishterin jedel qaraýǵa jáne baspanany bólý kezinde ashyqtyqty qamtamasyz etýge múmkindik beredi.
Sonymen qatar júıeni jetildirý tek tsıfrlandyrýmen shektelmeıdi. Azamattardyń ótinishteri men usynystary da nazardan tys qalmaıdy. «Otbasy bank» turǵyn úıge muqtaj retinde esepte turǵan qazaqstandyqtardan kelip túsetin ótinishterdi kún saıyn qarastyryp, keri baılanys beredi.
«Otbasy bank» Birinshi turǵyn úımen qamtamasyz etý ortalyǵynyń basqarma basshysy Dıdar Kúlpeıisovtiń aıtýynsha, azamattardan kelip túsken birqatar usynys turǵyn úıdi bólý tetikterin jetildirýge, qoldanystaǵy úderisterdi qaıta qaraýǵa jáne zańnamalyq ózgerister ázirleýge negiz boldy. Mundaǵy basty mindet — memlekettik turǵyn úı qoldaýyn halyq úshin barynsha túsinikti, qoljetimdi jáne ádil etý.
Osy baǵytta «Otbasy bank» Ónerkásip jáne qurylys mınıstrligimen birlesip turǵyn úı zańnamasyna birqatar ózgeris engizýge bastama boldy. Atap aıtqanda, «Turǵyn úı qatynastary týraly» jáne «Derbes derekter jáne olardy qorǵaý týraly» zańdarǵa ózgerister engizildi. Olardyń negizgi maqsaty — turǵyn úıdi azamattardyń naqty qajettilikterine beıimdeý. Zańnamalyq ózgeristerdiń bir bóligi qazirdiń ózinde qoldanysqa engizildi.
Mańyzdy ózgeristiń biri aýyl turǵyndaryna tikeleı qatysty. 2026 jyldyń 1 qyrkúıeginen bastap aýyldyq jerlerde jaldamaly turǵyn úıdi bólý tártibi ózgeredi.
Buǵan deıin turǵyn úıge muqtaj retinde esepte turǵan aýyl turǵyndaryna jaldamaly baspanany bólý avtomatty túrde júzege asyrylsa, endi azamattyń óziniń tańdaýyna basymdyq beriledi. Júıe belgili bir baspanany avtomatty túrde usynbaıdy. Turǵyn qoljetimdi nusqalardyń arasynan qajetti turǵyn úıdi ózi tańdap, oǵan ótinish berýi tıis. Tańdaý jasaǵannan keıin «Baspana market» portaly arqyly elektrondyq tsıfrlyq qoltańbany (ETsQ) paıdalanyp, ótinish berý qajet.
Osylaısha, 1 qyrkúıekten bastap aýyldyq jerlerdegi jaldamaly turǵyn úı azamattyń jeke tańdaýy men bergen ótinishi negizinde bólinedi.
Jańa tásildiń basty ereksheligi — aýyl turǵynyna tańdaý múmkindiginiń berilýi. Azamat óz aýdany shegindegi qoljetimdi turǵyn úılerdi salystyryp, otbasynyń qajettiligine sáıkes keletin nusqaǵa ótinish bere alady.
— Bul ózgeristiń basty maqsaty — aýyl turǵyndaryna tańdaý erkindigin berý. Azamatqa qandaı baspana qajet ekenin onyń ózi jaqsy biledi. Sondyqtan endi turǵyndar qoljetimdi nusqalardy qarap, óz otbasynyń qajettiligine sáıkes keletin turǵyn úıdi tańdap, ótinish bere alady. Mańyzdysy, bul tártip tek aýyldyq eldi mekenderde turatyn jáne turǵyn úıge muqtaj retinde esepte turǵan azamattarǵa qoldanylady, — deıdi Dıdar Nurlanuly.
Mańyzdysy, turǵyndarǵa elektrondyq tsıfrlyq qoltańbasynyń jaramdylyq merzimin aldyn ala tekserip, «Baspana market» portalyndaǵy aqparatpen tanysyp otyrǵan jón. Bul qolaıly turǵyn úı paıda bolǵan kezde ótinishti ýaqytyly berýge múmkindik beredi.
Jalpy engizilip jatqan ózgerister turǵyn úıdi bólý úderisindegi azamattyń rólin arttyrýǵa baǵyttalǵan. Eger buryn baspana avtomatty júıe arqyly bólinse, endi aýyl turǵyny usynylǵan nusqalardyń arasynan tańdaý jasap, sheshim qabyldaý úderisine tikeleı qatysady.
Osylaısha, jańa tártip aýyldarlaǵy turǵyn úıdi bólý júıesin túsiniktirek ári turǵyndardyń naqty qajettilikterine beıimdeýge múmkindik beredi.
