Aýyl turǵyndary taza aýyz sýǵa muqtaj – depýtat
Depýtattarynyń óńirlerge sapary aıasynda Májilis depýtaty, «AMANAT» partııasynyń múshesi Gúldara Nurymova Jambyl oblysyna baryp, jergilikti turǵyndarmen kezdesti, dep habarlaıdy Kazinform.
Áýlıeata óńirin aralaýdan bastaǵan depýtat aýyldyqtardyń máselesin tyńdady. Kezdesýde turǵyndar áleýmettik máselelerdi, aýyz sý, turaqty jumysmen qamtý, «Aýyl amanaty» jobasy aıasynda týyndaǵan problemalardy sheshý boıynsha ótinishterin jetkizdi.
«Elimizdiń túkpir-túkpirinde aýyldy jerlerge aýyz sý tartý jaǵy aqsap tur. Qarjy bólinedi, sý stantsııasy salynady, tıisti organdarmen qabyldanady. Biraq halyq áli kúnge sýsyz otyr. Jambyl oblysynda da osy másele aldymyzdan shyqty. Birneshe aýyl tirshilik nárine zárý», – dedi Gúldara Nurymova.
Іssapar barysynda Turar Rysqulov aýdanyna qarasty Jarlysý aýylynyń turǵyndary taza aýyz sýǵa muqtaj ekenderin aıtty. Al, aýdan ákimdigi «Jiger-2004» seriktestigimen sapaly sý tartý boıynsha 2020 jyly naýryzda shart jasaǵan. Jumysty sol jyldyń jeltoqsan aıynda qabyldap alǵan. Jobaǵa sáıkes tereńdik 200 metr bolýy qajet. Alaıda birinshi uńǵyma – 159 m, ekinshi uńǵyma – 171 m bolyp shyqqan. Saldarynan aýyl turǵyndary áli kúnge deıin tirshilik nárinen taryǵyp otyr. Depýtattyń aıtýynsha, endi bir jyl kepildik merzimi bar. Sol ýaqytty sarp etpeı, sý tartýdy tezdetý kerek. Sonymen qatar Gúldara Nurymova Moıynqum aýdany, Qylyshbaı aýylynyń halqy da aýyz sýdan tarshylyq kórip otyrǵanyn tilge tıek etti.
«Memleket basshysy óz joldaýynda 2025 jylǵa deıin aýyl halqyn sapaly aýyz sýmen tolyq qamtamasyz etý jóninde tapsyrma bergen. Prezıdent júktegen mindetti belgilengen merzim ishinde oryndaý kerek», – degen G.Nurymova aýyldardaǵy aýyz sý máselesin nazarǵa alatynyn aıtty.
Sonymen qatar depýtat «Aýyl amanaty» jobasy boıynsha júrgizilip jatqan jumystarymen tanysyp, turǵyndar tarapynan aıtylǵan usynystardy tyńdady.
