Aýyl turǵyndary kásip ashýǵa jyldyq 2,5%-ben nesıe ala alady
ASTANA. KAZINFORM – «Aýyl – El besigi» baǵdarlamasy aýyldyq ınfraqurylymdy jańǵyrtýǵa baǵyttalǵan. Ótken kezeńde baǵdarlamaǵa 177 mlrd teńge bólinip, 800 aýyl jańǵyrtyldy. Bul týraly Úkimettiń baspasóz qyzmeti habarlady.
Óńiraralyq aıyrmashylyqty azaıtý maqsatynda 2030 jylǵa deıingi óńirlik damý tujyrymdamasy qabyldandy. Memleket Óńirlik standarttar júıesin engizip, onyń talaptaryn bıýdjettik josparlaýmen baılanystyrdy. Negizgi ıgiliktermen qamtamasyz etilý deńgeıi tómen óńirler respýblıkalyq bıýdjetten basym tártippen qarjylandyrylady. 2025 jylǵy jaǵdaı boıynsha qalalardaǵy ortasha qamtamasyz etilý deńgeıi – 89,1%; aýyldarda – 67,6%. 2029 jylǵa qaraı bul kórsetkishterdi tıisinshe 96% jáne 71% deńgeıine jetkizý josparlanyp otyr.
«Aýyl – El besigi» baǵdarlamasy aýyldyq ınfraqurylymdy jańǵyrtýǵa baǵyttalǵan. Ótken kezeńde baǵdarlamaǵa 177 mlrd teńge bólinip, 800 aýyl jańǵyrtyldy. 2025 jyly respýblıkalyq bıýdjet pen Ulttyq qordan 73 mlrd teńge bólinip, 226 aýylda 255 joba júzege asyryldy. Nátıjesinde 150 áleýmettik nysan jáne 67 turǵyn úı-kommýnaldyq sharýashylyq nysany salynyp, qaıta jańǵyrtyldy, 180 km jol jańartyldy, 1 myń shaqyrym aýyldyq ınjenerlik jeli jańartyldy.
Aýyl turǵyndary «Aýyl amanaty» baǵdarlamasy aıasynda kásip ashýǵa jyldyq 2,5%-ben nesıe ala alady. Nesıe aýyl sharýashylyǵyna jatpaıtyn qyzmet túrleri úshin 5 jylǵa deıin, al AÓK salasynda 7 jylǵa deıingi merzimge beriledi. Eń joǵary nesıe somasy – 2,5 myń AEK-ke deıin, kooperatıvter úshin – 8 myń AEK-ke deıin. 2026 jyly jobany iske asyrýǵa 5,4 myń jobaǵa bıýdjettik mıkronesıeler men lızıng berý úshin 100 mlrd teńge qarastyrylǵan. Sonymen qatar qazirgi ýaqyttaǵy jaǵdaı boıynsha baǵdarlama aıasynda jalpy somasy 33,7 mlrd teńgege 3132 joba naqty qarjylandyryldy.
Kadr tapshylyǵy máselesin sheshý maqsatynda «Dıplommen – aýylǵa» bastamasy aıasynda densaýlyq saqtaý, bilim berý, áleýmettik qamsyzdandyrý, mádenıet, sport jáne AÓK salalarynyń jas mamandaryna 100 AEK mólsherinde kóterme járdemaqy jáne turǵyn úı satyp alýǵa jyldyq 1%-ben 15 jylǵa deıingi merzimge bıýdjettik nesıe beriledi. Bul rette maman aýyldyq jerde keminde úsh jyl jumys isteýge mindetti.
Shaǵyn qalalardy damytýǵa da erekshe kóńil bólinýde. 2025 jyly bıýdjet pen Ulttyq qordan 21 qalada 40 jobany iske asyrýǵa 11,9 mlrd teńge bólindi. Sonyń nátıjesinde 42 shaqyrym jol men 40 shaqyrym ınjenerlik jeli jańǵyrtyldy.
Aıta ketelik aýyl halqynyń 62,1%-y sport ınfraqurylymymen qamtylǵan.
