Aýyl sharýashylyǵyndaǵy jalaqy áleýmettik ádilettilik prıntsıpterine saı emes — Májilis depýtaty
ASTANA. KAZINFORM — Aýyl sharýashylyǵy salasyndaǵy jalaqy áleýmettik ádilettilik prıntsıpterine sáıkes kelmeıdi. Bul týraly Májilistiń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarınge saýal joldaǵan depýtat Tilektes Adambekov aıtty.
— Memleket basshysy Qasym-Jomart Toqaev Qazaqstan halqyna Joldaýynda aýyl sharýashylyǵy ǵylymyn damytýdyń naqty josparyn ázirleý kerek dep atap ótti. Atalǵan qujat tsıfrlyq tehnologııalardy qoldanýǵa jáne osy salanyń ónimdiligin edáýir arttyrýǵa arnalǵan jospar bolýǵa tıis. 2023 jylǵy jaǵdaı boıynsha eń tómen jalaqy tólenetin jumys oryndary aýyl sharýashylyǵy salasynda. Bul elimizdegi áleýmettik ádilettilik prıntsıpterine sáıkes kelmeıdi, — dedi depýtat.
Onyń dereginshe, 2010 jyldan 2023 jylǵa deıin aýyl sharýashylyǵyndaǵy naqty tabystardyń joǵary ósýine qaramastan, 2023 jyly ortasha jalaqy áli de respýblıkalyq ortasha kórsetkishten 4,4 ese tómen bolǵan.
— Búginde aýylsharýashylyǵy salasynda eńbek ónimdiligin arttyrýmen qatar, aýyl azamattarynyń jalaqysyn arttyrý máselesi óte ózekti, — dedi ol.
Osyǵan oraı Tilektes Adambekov vıtse-premerden myna máselelerge nazar aýdarýdy surady:
— Prezıdenttiń 2025 jyldyń 8 qyrkúıegindegi Qazaqstan halqyna Joldaýyna sáıkes, aýyl sharýashylyǵyndaǵy eńbek ónimdiligin arttyrý úshin aýyl sharýashylyǵy ǵylymyn damytý josparyn usyný;
— «sapaly jumys orny» tujyrymdamasy maqsattary úshin jumyspen qamtý merzimin joǵary qaraı qaıta qaraý jáne ony 12 aıǵa belgileý;
— orta jáne iri bızneste jergilikti qamtýdy damytý josparlaryn usyný.
Buǵan deıin elimizde jalaqyny esepteý tártibi ózgergenin jazǵan edik.