Aýyl sharýashylyǵynda statıstıkanyń burmalanýyna jol bermeý úshin ne istelinbek
ASTANA. KAZINFORM – Bıyl elimizde ósimdik sharýashylyǵyndaǵy ónimdi qadaǵalaý aqparattyq júıesi iske qosylady. Bul jaıynda Aýyl sharýashylyǵy mınıstrliginen málim etti.
- Memleket basshysynyń tapsyrmasy boıynsha ótken jyly agroónerkásiptik keshendegi burmalanǵan statıstıkalyq derekterdi retke keltirý jumystary júrgizildi. Nátıjesinde mal sharýashylyǵynda 2 mln iri qara, 3,2 mln usaq mal jáne 3 mln tonna sút pen basqa da ónimder, ósimdik sharýashylyǵynda 1,7 mln tonna kartop pen 315 myń tonna pııaz esepten shyǵaryldy. Jańartylǵan derekter ishki naryqty retteý boıynsha sheshimder qabyldaý men josparlaý sapasyn arttyrýǵa múmkindik beredi. Jalǵan kórsetkishterdiń qaıtalanýynyń aldyn alý úshin aýyl sharýashylyǵy salasynda ónimdi esepke alý jáne qadaǵalaý boıynsha aqparattyq júıeler engizilip jatyr. Osyǵan oraı, ósimdik sharýashylyǵyndaǵy ónimdi qadaǵalaý aqparattyq júıesi, onyń ishinde astyq boıynsha júıe ázirlendi. Júıeni iske qosý 2025 jylǵa josparlanǵan. Bul júıe «egisten sórege deıin» qaǵıdaty boıynsha ósimdik sharýashylyǵy ónimderdi esepke alý men monıtorıng júrgizý protsesterin avtomattandyrýǵa baǵyttalǵan. Júıe óndiris, saqtaý, tasymaldaý jáne ótkizý kezeńderindegi ashyqtyq pen baqylaýdy qamtamasyz etedi, - dedi mınıstrlikten agenttik saýalyna oraı.
Vedomstvo málimetinshe, 2025 jyldyń basynan bastap, Aqmola oblysynda ósimdik sharýashylyǵyndaǵy ónimdi qadaǵalaý aqparattyq júıesin pılottyq rejımde engizý jumystary bastaldy. Pılottyq joba sátti aıaqtalǵannan keıin ol Qazaqstannyń barlyq óńirine engizilmek.
Sonymen qatar mınıstrlik Memleket basshysynyń tapsyrmasyna sáıkes, bıyl 1 tamyz ben 20 qazan aralyǵynda ulttyq aýyl sharýashylyǵy sanaǵyn júrgizý kózdelgenin atap ótedi.
- Jalpy, aýyl sharýashylyǵy sanaǵy elimizdegi aýyl sharýashylyǵynyń jaı-kúıi men damý úrdisteri týraly tolyq ári shynaıy aqparat alýǵa múmkindik beredi. Bul óz kezeginde memlekettik agrarlyq saıasattyń tıimdiligin arttyryp, bıznes pen halyq úshin sheshim qabyldaýǵa negiz bolatyn senimdi derekkózine aınalady. Saladaǵy statıstıkalyq derekterdiń burmalaný máselesin júıeli sheshý úshin Memleket basshysynyń 2024 jylǵy 2 qyrkúıektegi Qazaqstan halqyna Joldaýyn iske asyrý jónindegi Jalpyulttyq is-sharalar josparynyń 18-tarmaǵyna sáıkes, arnaıy Jol kartasy ázirlenip, bekitildi. Onda mal jáne ósimdik sharýashylyǵyndaǵy statıstıkalyq derekterdiń shynaıylyǵyn qamtamasyz etýge baǵyttalǵan, sondaı-aq aýyl sharýashylyǵy taýar óndirýshilerine memlekettik qoldaý kórsetý kezinde zań buzýshylyqtarǵa jol bermeýge yqpal etetin júıeli sharalar kózdelgen, - dedi mınıstrlikten.
Ótken jyldyń maýsymynda Parlament Májilisinde ótken mal sharýashylyǵy ónimderin tereń óńdeý taqyrybyna arnalǵan Úkimet saǵatynda Aýyl sharýashylyǵy mınıstri Aıdarbek Saparov biraz jyldar boıy mal sharýashylyǵynda da, ósimdik sharýashylyǵynda da statıstıkalyq derekter burmalanyp kelgenin aıtqan edi.