Aýyl sharýashylyǵynda ósim bar, biraq turaqtylyqqa ǵylym qajet — depýtat
ASTANA. KAZINFORM — Qazaqstanda 2025 jyly aýyl sharýashylyǵy salasy shamamen 6 paıyzǵa ósip, agroónerkásip kesheni ónimderiniń kólemi 15 trıllıon teńgege jetti. Bul týraly Quryltaı depýtaty Maqsut Nasıbýlov halyqaralyq konferentsııada aıtty.
Depýtattyń aıtýynsha, óndiris kóleminiń artýy salanyń turaqty damýyn bildirmeıdi. Ol úshin ǵylymı zertteýlerdi júıeli júrgizip, olardyń nátıjesin aýyl sharýashylyǵynda qoldaný qajet.
— Óndiris kóleminiń ósýi áli turaqtylyqtyń belgisi emes. Turaqty damýdyń negizi — bilim men ǵylym. Aýyl sharýashylyǵyndaǵy ǵylymı zertteýler uzaq ýaqytty qajet etedi. Alǵashqy býdandastyrýdan bastap jańa sortty egistikke engizýge deıin 10–15 jyl ótedi, — dedi depýtat.
Onyń sózinshe, aýyspaly egistiń tıimdiligi men topyraq qunarlylyǵyndaǵy ózgeristerdi bir jyldyń ishinde anyqtaý múmkin emes. Óıtkeni qurǵaqshylyq jyldar jaýyn-shashyndy kezeńdermen almasyp otyrady. Sondyqtan ár egis maýsymynda jınalǵan ǵylymı derekterdiń mańyzy zor.
Maqsut Nasıbýlov elimizde ǵylymǵa bólinetin qarjynyń artqanyna da toqtalyp ótti. Onyń keltirgen málimetinshe, ǵylymı zertteýlerge jumsalatyn shyǵyn shamamen alty ese ósken. Al qazir Qazaqstanda 24 myń zertteýshi bolsa, onyń 14 myńy — jas ǵalym.
Depýtat aýyl sharýashylyǵynda spýtnıkterdi, ushqyshsyz ushý apparattaryn, túrli datchıkter men jasandy ıntellektini qoldanýdyń múmkindigi mol ekenin de atap ótti. Bul tehnologııalar topyraqtyń jaǵdaıyn anyqtaýǵa jáne ósimdik aýrýlaryn aldyn ala boljaýǵa kómektesedi.
— Jasandy ıntellektiniń múmkindigi ony úıretýge paıdalanylǵan derekterdiń senimdiligine tikeleı baılanysty. Kópjyldyq tekserilgen derekter bolmasa, jasandy ıntellekt senimdi sóılegenimen, qate jaýap berýi múmkin. Sondyqtan agrarlyq ǵylymdy tsıfrlandyrý biryńǵaı ólsheý ádisterine jáne derekterdi qadaǵalaý múmkindigine negizdelýi tıis, — dedi depýtat.
Sonymen qatar ol sý resýrstaryn tıimdi paıdalanýdyń mańyzyn aıtty. Prezıdent Joldaýynda atap ótilgendeı, zamanaýı sýarý tehnologııalary dástúrli daqyldardyń ónimdiligin 2–2,5 esege arttyrýǵa múmkindik beredi.
— Aýyl sharýashylyǵynyń turaqty damýy óndiris kólemine ǵana emes, ǵylymı zertteýlerdiń sapasyna, senimdi derekterge jáne jańa tehnologııalardy tıimdi paıdalanýǵa baılanysty, — dedi ol.
Aıta keteıik, buǵan deıin Qazaqstanda aýyl sharýashylyǵy salasyndaǵy ǵylymı jobalardy qarjylandyrý merzimin qazirgi 3 jyldan 5–10 jylǵa deıin uzartý usynylǵan edi.
