Aýyl sharýashylyǵynda eski tásildermen ónimdilikti arttyrý múmkin emes – Máýlen Áshimbaev
ASTANA. KAZINFORM – Aýyl sharýashylyǵy ónimderin óńdeý salasyn sýbsıdııalaý jáne agrosektordy qarjylandyrýdyń tıimdi tetikterin qalyptastyrý qajet. Bul týraly elordada «Azyq-túlik qaýipsizdigi – ulttyq qaýipsizdiktiń negizgi quramdas bóligi» taqyrybynda ótip jatqan parlamenttik tyńdaýda Senat tóraǵasy Máýlen Áshimbaev málim etti.
- Jalpy, azyq-túlik qaýipsizdigin qamtamasyz etý – memlekettiń agrarlyq jáne ekonomıkalyq saıasatynyń negizgi basymdyqtarynyń biri. Ózderińizge belgili, Prezıdent Qasym-Jomart Toqaev bul máselege únemi basa mán berip keledi. Memleket basshysy azyq-túlik qaýipsizdigi máselesin túbegeıli sheshý qajet ekenin aıtty. Prezıdent bul Úkimet pen ákimderdiń aldynda turǵan negizgi basymdyq ekenine de aıryqsha toqtaldy. Sondyqtan osy máseleni parlamenttik tyńdaýdyń kúntártibine shyǵaryp, jan-jaqty talqylaýdy jón kórdik. Azyq-túlik qaýipsizdigin tolyqqandy qamtamasyz etýge elimizdiń barlyq múmkindigi bar. Aýyl sharýashylyǵy eńbekkerleriniń birinshi forýmynda Prezıdent agrarlyq salany odan ári damytýdyń strategııalyq baǵyttaryn belgilep berdi. Shyn máninde, elimizdiń bul salada áleýeti zor, - dedi M. Áshimbaev.
Osy oraıda ol Qazaqstan egistik jerler men jaıylymdar boıynsha álemde altynshy oryn alyp otyrǵanyn eske saldy. Sondaı-aq elimiz bıdaı eksporttaýshy elderdiń alǵashqy ondyǵyna jáne un eksporty boıynsha kóshbasshylar qataryna kiredi.
- Sonymen qatar, qazir tamaq ónimderin óndirý salasy elimizde dáıekti túrde damyp keledi. Bul baǵyt óńdeý ónerkásibiniń shamamen 14 paıyzyn quraıdy. Sońǵy bes jylda aýyl sharýashylyǵyndaǵy negizgi kapıtalǵa salynǵan ınvestıtsııa kólemi eki esege jýyq óskenin de atap ótken jón. Alaıda osyndaı áleýet pen artyqshylyqtarǵa qaramastan, qazirgi tańda elimizdiń aýyl sharýashylyǵy salasynda birqatar ózekti másele bar. Ony ashyq aıtýymyz kerek. Azyq-túlik ımporty da az emes. Eń aldamen, salanyń ónimdiligin arttyrý máselesi asa mańyzdy. Jalpy, eńbek ónimdiliginiń tómen bolýy túrli sebepterge baılanysty. Onyń ishinde tehnıkalyq jabdyqtaýdyń jetkiliksizdigi jáne aýyl sharýashylyǵynda zamanaýı ınnovatsııalyq tehnologııalardy tıisti deńgeıde paılanbaý máseleleri bar. Bul salada negizgi tehnıkanyń tozýy shamamen 40 paıyzdy quraıdy, al jańartý koeffıtsenti tek 10 paıyzǵa teń. Sondaı-aq qoldanystaǵy tehnıkanyń 70 paıyzynyń paıdalaný merzimi 10 jyldan asady. Tozǵan jabdyqtarmen jáne eski tásildermen, ınnovatsııasyz ónimdilikti arttyrý múmkin emes ekeni sózsiz. Sondyqtan bul baǵytta jaǵdaıdy ózgertý úshin naqty qadamdar qajet dep esepteımiz, - dedi Senat tóraǵasy.
Onyń aıtýynsha, Memleket basshysy 2028 jyly elimizde óńdelgen aýyl sharýashylyǵy ónimderiniń úlesin 70 paıyzǵa deıin jetkizýdi mindet etip júktedi. Osy baǵytta. Memlekettik organdar tıimdi ári naqty qadamdardy júzege asyrýy kerek. Ol úshin aýyl sharýashylyǵy ónimderin óńdeý salasyn sýbsıdııalaý jáne agrosektordy qarjylandyrýdyń tıimdi tetikterin qalyptastyrý qajet. Osy baǵytta Úkimet jaǵynan belsendi jumys júrgizilýi tıis.