Aýyl sharýashylyǵynda egisti ártaraptandyrý jumystary kúsheıtildi
ASTANA. KAZINFORM — Prezıdent Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» Joldaýy men Memleket basshysynyń tapsyrmalaryn oryndaý aıasynda elimizde ósimdik sharýashylyǵynda tıimdilikti arttyrýǵa jáne turaqty óndiristi damytýǵa baǵyttalǵan júıeli ózgerister qolǵa alynýda.
Salanyń negizgi mindetteriniń biri — egis alqaptaryn ártaraptandyrý jáne sý únemdeý tehnologııalaryn engizý. 2025 jyly bıdaı egistiginiń kólemi 884,6 myń gektarǵa qysqaryp, 12,3 mln gektardy qurady. Al maıly daqyldar kólemi 1 mln gektarǵa artyp, 4 mln gektarǵa jetti. Sonymen qatar qant qyzylshasynyń egis qurylymyn ońtaılandyrý jumystary júrgizilip jatyr.
«Memleket basshysy jyl saıyn 150 myń gektarǵa deıin sý únemdeıtin tehnologııalardy engizýdi tapsyrǵan bolatyn. 2024 jyldyń qorytyndysy boıynsha bul jospar artyǵymen oryndalyp, 158 myń gektardy qurady. Al bıyldyń ózinde sý únemdeıtin tehnologııalar 109,8 myń gektar alqapqa engizildi. Jalpy alǵanda, mundaı tehnologııalar qoldanylatyn jer kólemi 580 myń gektarǵa deıin ulǵaıdy», – dedi QR Aýyl sharýashylyǵy mınıstri Aıdarbek Saparov.
Osylaısha, Qazaqstanda ósimdik sharýashylyǵyn ártaraptandyrý men zamanaýı tehnologııalardy engizý arqyly ónimdilik standarttary jańartylyp, aýyl sharýashylyǵynda jańa damý baǵyty qalyptasýda.
Aıta keteıik, mal sharýashylyǵy AÓK-tiń jalpy óniminiń 40%-yn qamtamasyz etip otyr.