Aýyl sharýashylyǵynda biryńǵaı tsıfrlyq ekojúıe qurý máselesi qaraldy
ASTANA. KAZINFORM — Ulttyq statıstıka bıýrosynda mal jáne ósimdik sharýashylyqtaryndaǵy derekterdiń durystyǵy, sondaı-aq aýyl sharýashylyǵy taýaryn óndirýshilerge memlekettik qoldaý kórsetý kezinde buzýshylyqtarǵa jol bermeý máseleleri jónindegi vedomstvoaralyq jumys tobynyń besinshi keńesi ótti. Bul týraly statbıýronyń baspasóz qyzmeti málim etti.
Kezdesýge aýyl sharýashylyǵy mınıstrliginiń, Qarjy mınıstrliginiń, Jasandy ıntellekt jáne tsıfrlyq damý mınıstrliginiń, «Báıterek» holdınginiń, sondaı-aq QR Ulttyq qaýipsizdik komıtetin qosa alǵanda, basqa da memlekettik organdardyń ókilderi qatysty.
Otyrys barysynda jumys tobynyń músheleri statıstıkalyq aqparattyń sapasy men aýyl sharýashylyǵy óndirýshilerine memlekettik qoldaý kórsetý kezinde derekterdiń burmalaný qaýipin azaıtý máselelerine erekshe nazar aýdardy. Aqparattyq júıelerdiń ıntegratsııa men AÓK biryńǵaı tsıfrlyq ekojúıesin damytýdy qosa alǵanda, agrosektordy tsıfrlandyrý baǵyttary da sóz boldy.
Sondaı-aq, derekterdiń negizgi kózi retinde aýyl sharýashylyǵy janýarlaryn esepke alýdyń biryńǵaı júıesine kóshýdiń yqtımal merzimderi qarastyryldy.
– Aqparattyq júıeler bir orynda turmaıdy – árdaıym damyp, jańa málimettermen tolyǵyp otyrady. Integratsııalyq kelisimderdi keńeıtý máseleleri jıi kóterilip otyrady, sondyqtan jedel vedomstvoaralyq ózara is-qımyldy qamtamasyz etý óte mańyzdy. Bıýro memlekettik organdarmen birlesip, aqparattyq júıelerdegi derekterdiń sapasyn qamtamasyz ete otyryp, salany tsıfrlandyrýdy jedeldetý jónindegi keshendi sharalardy iske asyrý jumysyn úılestirip keledi, – dedi Bıýro basshysy Maqsat Turlybaev.
Kezdesýde ákimshilik esepti avtomattandyrýdy damytý jáne aýyl sharýashylyǵyndaǵy ǵaryshtan jasalǵan monıtorıng derekterin qoldaný máseleleri de talqyǵa tústi. QR Jasandy ıntellekt jáne tsıfrlyq damý mınıstrligine ǵaryshtan túsirilgen monıtorıng derekterin statıstıkalyq maqsattarda da, memlekettik qoldaý kórsetý týraly sheshimder qabyldaý kezinde de júıeli paıdalaný máselelerin pysyqtaý usynyldy.
Keńes qorytyndysy boıynsha jumys tobynyń qatysýshylary agrarlyq sektordaǵy derekterdiń ashyqtyǵyn, durystyǵyn jáne salystyrymdylyǵyn arttyrýǵa baǵyttalǵan birqatar usynymdar ázirledi.
Eske sala keteıik, byltyr aýyl sharýashylyǵy salasynda 144 bıznes-protsesti tsıfrlandyrýdy kózdeıtin agroónerkásip kesheni tsıfrlyq transformatsııasynyń jańartylǵan kartasy bekitildi. Salada Gosagro.kz, aýyl sharýashylyǵy janýarlaryn sáıkestendirý, «Biryńǵaı avtomattandyrylǵan basqarý júıesi» jáne E-Fish sııaqty aqparattyq júıeler belsendi jumys isteıdi.
