Aýyl sharýashylyǵynda bir de bir membaǵdarlama sońyna deıin iske aspaǵan — depýtat
ASTANA. KAZINFORM — Elimizde azyq-túlik qaýipsizdigi týraly zań jobasy qabyldanýy qajet. Bul týraly Májilis depýtaty Anas Baqqojaev bastama kóterdi.
«Ekonomıkanyń ósý qarqyny boıynsha agrarly sala eń tómengi kórsetkishke ıe. 2005 jyldan beri aýyl sharýashylyǵy boıynsha qabyldanǵan birde-bir memlekettik baǵdarlamala sońyna deıin iske aspaǵan. Agrarly saıasattyń turaqsyzdyǵy sonshalyq, sońǵy 20 jylda sýbsıdııa berý erejeleri 57 ret ózgergen. Nátıjesinde aýyl sharýashylyǵy sybaılas jemqorlyq qateri joǵary salalardyń qataryna kirdi», — dedi depýtat Májilistiń jalpy otyrysynda.
Onyń aıtýynsha, sońǵy 10 jylda dúken sórelerindegi ımporttyq taýarlar úlesi 3 ese ósken. Qansha baǵdarlama jasalsa da, eldegi qaıta óńdeý kásiporyndardyń naqty óndiris qýaty 30 paıyzdan asqan emes. Oǵan qosa, birqatar eksporttyq baǵyttardy elimiz ýysynan shyǵaryp aldy.
«Baǵa saıasaty fermerlerdiń emes, alypsatarlardyń qolynda. Olardyń paıdasy sharýalarǵa qaraǵanda 4 ese kóp. Aýyl adamdarynyń nesibesin bazar qaqpasyn torlaǵan deldaldar alyp júr. Bazarlarda mal sharýashylyǵy ónimderin tekseretin veterınarııalyq-sanıtarııalyq zerthanalar jeke-menshiktiń qolynda bolǵan soń, olardyń sapasy shala tekseriledi. Mundaǵy eń ókinishtisi — sońǵy 5 jylda jazdaǵy qurǵaqshylyq pen qys mezgilindegi mal juty qalypty jaǵdaıǵa aınaldy. Osyndaı jaǵdaıda turaqty kómektesetin júıe joq», — dedi ol.
Sonymen birge, elektr energııasy, jylý men kommýnaldyq tarıfterdiń ósýi talaı jobalardyń damýyna kedergi keltirgen.
«Sońǵy jyldary agrosalaǵa jeke ınvestıtsııalar álsin-álsin kele bastaǵan edi, jańa bıznesmender osyndaı turaqsyzdyqty kórip, aýyl sharýashylyǵynan at-tonyn ala qashty. Kóptegen sharýashylyqtar satylyp jatyr. Munyń bári azyq-túlik qaýipsizdigine arnalǵan arnaıy zańnyń joqtyǵynan bolyp otyr. „Aýyl“ partııasy azyq-túlik qaýipsizdigi týraly zań jobasyn ázirlep, Úkimettiń qaraýyna jibergen bolatyn. Alaıda tıisti qoldaý tappady. Osyǵan baılanysty „Aýyl“ fraktsııasynyń depýtattary azyq-túlik qaýipsizdigi týraly zań jobasy Úkimet deńgeıinde qaıta qaralyp, pysyqtalýyn talap etedi», — dedi A. Baqqojaev.
