Aýyl sharýashylyǵyna jumsalatyn sýdyń 45% ysyrap bolyp jatyr – Natalıa Godýnova

Májiliste Joǵary aýdıtorlyq palatanyń tóraıymy Natalıa Godýnova sý resýrstarynyń basqarylý tıimdiligine júrgizilgen aýdıtorlyq is-sharalardyń qorytyndysyn tanystyrdy, dep habarlaıdy Kazinform.

«Ózge eldermen salystyrǵanda biz is júzinde sý únemdeý tehnologııalaryn qoldanbaımyz nemese óte sırek qoldanamyz. Eski kanaldar men tozyǵy jetken jelilerde ysyrap bolyp jatqan sýdyń kólemi óte úlken. Biz eseptedik. 2022 jyly aýyl sharýashylyǵynda ǵana ysyrap bolǵan sýdyń kólemi 5,2 tekshe shaqyrym bolǵan. Bul salaǵa alynǵan sýdyń 45 paıyzy degen sóz», – dedi ol.

Natalıa Godýnova bul shyǵyndy joısa, transshekaralyq ózenderge táýeldilikten arylýǵa bolatynyn aıtady.

«Al transshekaralyq ózender arqyly syrttan keletin sýdyń tapshylyǵy byltyr 0,8 tekshe shaqyrym bolǵan. Osydan-aq sý únemdeý tehnologııasyn jappaı engizý arqyly transshekaralyq ózenderden keletin sýdyń tapshylyǵyn qalaı jabýǵa bolatynyn ózderińiz de baǵalaı alasyzdar», – dedi Joǵary aýdıtorlyq palata basshysy.