Aýyl sharýashylyǵyna salynǵan ınvestıtsııa 1,6 trln teńgege jetti

Soltústik Qazaqstan oblysyna jumys sapary aıasynda Premer-mınıstr Oljas Bektenov kóktemgi egis jumystaryn aıaqtaý jáne agroónerkásip keshenin damytý máseleleri jóninde keńes ótkizdi. Jıynda aýyl sharýashylyǵy mınıstri Aıdarbek Saparov, ekologııa jáne tabıǵı resýrstar vıtse-mınıstri Jomart Álıev, «Báıterek» holdınginiń basqarma tóraǵasy Rýstam Qaraǵoıshın baıandama jasady. Sonymen qatar jıynda Aqmola, Soltústik Qazaqstan, Qostanaı, Túrkistan, Batys Qazaqstan oblystarynyń ákimderi jáne agrarshylar atynan «Zenchenko ı K» sharýa qojalyǵynyń dırektory Gennadıı Zenchenko sóz sóıledi.

— Aýyl sharýashylyǵy — el ekonomıkasynyń basym baǵyty. Prezıdent Qasym-Jomart Toqaev salanyń qarqyndy damýyna erekshe nazar aýdaryp, onyń aýyl turǵyndarynyń ómir súrý sapasyn jaqsartýdaǵy mańyzdylyǵyn, sondaı-aq azyq-túlik qaýipsizdigin jáne ekonomıkanyń ornyqty ósýin qamtamasyz etýdegi rólin únemi erekshe atap kórsetip keledi, — dep atap ótti Oljas Bektenov.

Aýyl sharýashylyǵy mınıstri Aıdarbek Saparov egis naýqanynyń aıaqtalǵany týraly baıandady. Bıyl 23,8 mln gektar alqapqa aýyl sharýashylyǵy daqyldary egildi, bul ótken jylǵy kórsetkishten 180 myń gektarǵa artyq. Prezıdent tapsyrmasy boıynsha joǵary rentabeldi jáne áleýmettik mańyzy bar daqyldar alqaptaryn ulǵaıta otyryp, egis alqaptary qurylymyn ártaraptandyrý jumystary júrgizilýde. Máselen, dándi jáne dándi-burshaqty daqyldar alqaby 15,8 mln gektarǵa, maıly daqyldar 4,3 mln gektarǵa, mal azyqtyq daqyldar 3,3 mln gektarǵa egildi. Shegirtkege qarsy kúres aıasynda bıyl 2,2 mln gektar jer óńdeledi. Búginde shamamen 665 myń gektarda zııankesterge qarsy is-sharalar aıaqtaldy. Kóktemgi egis jumystaryn júrgizý úshin memleket tarapynan qajetti qoldaý sharalary qabyldandy: sharýalar 402 myń tonna jeńildetilgen dızel otynymen qamtamasyz etildi, 2,3 mln tonna kóleminde tuqymǵa qajettilik tolyq jabyldy, 2,3 mln tonna mıneraldy tyńaıtqyshtar engizý josparlanǵan.

Tórt aıda et óndirisi 338 myń tonna boldy (+3,4%). Sıyr etin óndirý kólemi 112,9 myń tonna (+6,1%), qoı eti 34,7 myń tonna (+8,1%), jylqy eti 41,2 myń tonna (+3,8%) boldy.

Mal sharýashylyǵyn damytýdyń tıimdiligi veterınarııalyq qaýipsizdikke tikeleı baılanysty. Osyǵan baılanysty Úkimet veterınarııalyq qyzmetti nyǵaıtý, ınfraqurylymdy jańǵyrtý jáne eńbek jaǵdaıyn jaqsartýǵa baǵyttalǵan júıeli sharalardy júzege asyryp jatyr.

— Sońǵy eki jylda jergilikti atqarýshy organdar 9,1 mlrd teńge somasyna shamamen 600 veterınarııalyq nysan saldy. Memlekettik veterınarııalyq zerthanalardy qosymsha jaraqtandyrý jumystary jalǵasyp jatyr. Respýblıkalyq bıýdjetten beriletin jalpy sıpattaǵy transfertter sheńberinde ınfraqurylymdy damytýǵa 66,2 mlrd teńge bólindi. Qabyldanyp jatqan sharalardyń nátıjesi eleýli jetistikke ákeldi — Qazaqstan resmı túrde aýsyldan taza el mártebesine ıe boldy. Bul mártebe otandyq mal sharýashylyǵy ónimderiniń eksporttyq áleýetin nyǵaıtýǵa yqpal etedi, — dep baıandady Aıdarbek Saparov.

Búginde aýyl sharýashylyǵy ónimderi eksportynyń jalpy kólemindegi óńdelgen ónim úlesi 51%-dan asty, bul salanyń qosylǵan quny joǵary ónim óndirýge kezeń-kezeńimen kóship jatqanyn kórsetedi.

Jalpy alǵanda AÓK-tegi negizgi kapıtalǵa salynǵan ınvestıtsııalar kólemi 1,6 trln teńgege jetti, bul ótken jylǵy deńgeıden joǵary. Sońǵy 2 jylda qazirgi zamanǵy mal sharýashylyǵy keshenderinen bastap tereń óńdeý kásiporyndaryna deıin 540 jańa óndiris paıdalanýǵa berildi. Onyń ishinde 89 mal sharýashylyǵy kesheni, 70 taýarly-sút fermasy, 35 astyq qoımasy, 35 kókónis qoımasy, 16 qus fabrıkasy, 11 jylyjaı salyndy, ósimdik maılaryn óndirý jáne tereń óńdeý boıynsha 12 joba júzege asyryldy. 2026 jyly tehnıka parkin jańartý qarqyny 8%-ǵa jetpek, bul rette parktiń tozýy 65%-ǵa deıin tómendeıdi. 

Aıta ketelik Premer-mınıstr Oljas Bektenov Soltústik Qazaqstan oblysyna jumys sapary aıasynda Prezıdenttiń agroónerkásip keshenin damytý, aýyl sharýashylyǵynyń ónimdiligin arttyrý jáne otandyq ónimdi tereń óńdeý jónindegi tapsyrmalarynyń oryndalý barysyn teksergen edi.