Aýyl sharýashylyǵyna bólinetin sýbsıdııanyń tıimdiligi teksereledi — Álıhan Smaıylov
ASTANA. KAZINFORM — Joǵary aýdıtorlyq palatanyń tóraǵasy Álıhan Smaıylov kvazımemlekettik sektordy tekserýge qatysty pikir aıtty.
Onyń sózine qaraǵanda, bıyl memlekettik aýdıt jumysynyń tıimdiligi edáýir kóterildi.
«30 jeke adam men 16 zańdy tulǵa ákimshilik jaýapkershilikke, al 173 adam tártiptik jazaǵa tartyldy. Sonymen qatar, 12 materıal quqyq qorǵaý organdaryna joldandy. Jyldyń sońyna deıin birqatar aýdıtorlyq jumys jalǵasady. Onyń arasynda aýyl sharýashylyǵyna bólinetin sýbsıdııanyń tıimdiligi teksereledi. Budan bólek, kóleńkeli ekonomıkaǵa qarsy is-qımyldyń tıimdiligine aýdıt jasalyp otyr. Ulttyq ulan men oǵan baǵynysty uıymdardyń jumysyna da aýdıt júrgizilip jatyr», — dedi Joǵary aýdıtorlyq palata tóraǵasy Parlament Májilisinde tilshiler suraǵyna jaýap bere otyryp.
Á. Smaıylov kvazımemlekettik sektor da aýdıtpen qamtylǵanyn aıtty.
«QazMunaıGaz» jáne «Báıterekke» qatysty aýdıt jalǵasyp jatyr. Bul jumysty keler jyldyń birinshi toqsanynda aıaqtaımyz. Onyń qorytyndysyn jarııalaımyz, sondaı-aq Parlamenttiń qaraýyna usynamyz», — dedi ol.
Onyń sózine qaraǵanda, 9 aıdyń qorytyndysy boıynsha 18 aýdıtorlyq is-shara aıaqtaldy.
«Bul rette 9 trln teńgeden astam qarajat qamtyldy. Osy jumystyń aıasynda 640 mlrd teńge somasynda zańnama talaptaryn buzýdyń túrli deregin anyqtadyq. Sonyń ishinde aktıvterdi jáne qarajatty tıimsiz paıdalanýǵa qatysty 318 mlrd teńgeni eseptedik. Qarjy salasyndaǵy zańnama talaptaryn buzý turǵysynda 133 mlrd teńge jáne tıimsiz josparlaý boıynsha 187 mlrd teńge anyqtaldy. Bul jumystardyń nátıjesinde 115 teńge respýblıkalyq bıýdjetke óteldi. Byltyr osy kórsetkish tek 5 mlrd teńgeni quraǵan edi», — dedi Á. Smaıylov.
