Aýyl sharýashylyǵyna arnalǵan jeńildetilgen nesıe alǵash ret 1 trıllıon teńgeden asty — Prezıdent

ASTANA. KAZINFORM — Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda bıyl aýyl sharýashylyǵyna arnalǵan jeńildetilgen nesıe kólemi el tarıhynda alǵash ret 1 trıllıon teńgeden asqanyn aıtty. Bul týraly Aqordanyń baspasóz qyzmeti habarlady.  

— Agroónerkásip keshenin qarjylandyrý tásilderin jetildirý kerek. Bıyl aýyl sharýashylyǵyna arnalǵan jeńildetilgen nesıe kólemi el tarıhynda alǵash ret 1 trıllıon teńgeden asty. Bul — osydan 5 jyl burynǵy jaǵdaımen salystyrǵanda 10 ese artyq kórsetkish. Nesıe qoljetimdi bolýy úshin bankterge quzyrly mekeme tarapynan kepildik berý tásili engizildi. Bıyl «Damý» qory 1300 nesıege kepildik berdi. Sóıtip nesıe alýǵa múlki jetkiliksiz kóptegen sharýanyń, ásirese, shaǵyn jáne orta deńgeıdegi fermerlerdiń máselesi oń sheshimin tapty. Elimizde óndiriletin tehnıka jeńildetilgen lızıngpen berile bastady. Bul ábden eskirgen tehnıkany jańartýǵa arnalǵan óte tıimdi sheshim boldy, — dedi Prezıdent.

Memleket basshysy tórt jyl buryn aýyl sharýashylyǵy tehnıkalarynyń 90 paıyzy tozyp turǵanyn aıtty.

— Bul kórsetkish bıyl 70 paıyzǵa deıin tómendedi. Osy baǵyttaǵy jumysty bıznes ókilderimen birlesip, ári qaraı jalǵastyrý qajet. Qazir sharýalar alyp jatqan tehnıkanyń 90 paıyzy Qazaqstanda shyǵarylǵan. Elimizdegi 10 zaýytta osyndaı 19 túrli tehnıka qurastyrylady. Olardyń qatarynda álemge tanymal brendter bar. Jaqynda Amerıka Qurama Shtattaryna jumys saparym kezinde John Deere kompanııasymen birge quny 2,5 mıllıard dollar bolatyn strategııalyq seriktestik týraly kelisimge qol qoıyldy. Soǵan sáıkes aldaǵy bes jylda elimizde 3 myńǵa jýyq zamanaýı tehnıka shyǵarylady, — dedi ol.

Aıta keteıik, Prezıdent Aýyl sharýashylyǵy eńbekkerleriniń ekinshi forýmyna qatysyp jatyr.

Prezıdent bıyl dıqandarymyz 27 mıllıon tonna astyq jınaǵanyn aıtty.