Aýyl sharýashylyǵyn tsıfrlandyrý: 650-den astam agrokásiporyn jańa tehnologııaǵa kóshti
ASTANA.KAZINFORM — Qazaq eginshilik jáne ósimdik sharýashylyǵy ǵylymı-zertteý ınstıtýtynyń bazasynda agroónerkásiptik óndiriste tsıfrlyq tehnologııalardy engizý jáne agrarlyq sektorda ınnovatsııalyq sheshimderdi damytýǵa arnalǵan «Dala kúni – 2026» respýblıkalyq semınar-keńes ótti. Bul týraly AShM málim etti.
Іs-sharaǵa Aýyl sharýashylyǵy vıtse-mınıstri Azat Sultanov, ǵylymı-zertteý ınstıtýttarynyń basshylary, agrobıznes ókilderi, joǵary oqý oryndarynyń ǵalymdary, halyqaralyq uıymdar men fermerlik sharýashylyqtardyń ókilderi qatysty.
Shara ınstıtýttyń demonstratsııalyq alqaptaryn aralaýdan bastaldy. Qatysýshylarǵa aýyl sharýashylyǵy daqyldarynyń jańa sorttary, zamanaýı sýarý júıeleri, egistikterdi monıtorıngteý tsıfrlyq platformalary, dálme-dál eginshilik tehnologııalary, sondaı-aq selektsııa jáne tuqym sharýashylyǵy salasyndaǵy sońǵy ázirlemeler tanystyryldy. Sondaı-aq tájirıbe júzinde ushqyshsyz ushý apparattaryn, topyraq pen ylǵaldylyq jaǵdaıyn baqylaý quraldaryn, ósimdikterdiń damýyn naqty ýaqyt rejıminde taldaý jáne boljaýǵa arnalǵan tsıfrlyq júıelerdi qoldaný múmkindikteri kórsetildi.
Plenarlyq otyrysta sóz sóılegen Azat Sultanov tsıfrlyq monıtorıngti, avtomattandyrylǵan basqarý júıelerin jáne dálme-dál eginshilik tehnologııalaryn damytý memlekettik agrarlyq saıasattyń negizgi baǵyttarynyń biri ekenin atap ótti.
— Memleket basshysy bıylǵy jyldy Tsıfrlandyrý jáne jasandy ıntellekt jyly dep jarııalady. Osyǵan baılanysty búgingi Dala kúnine arnalǵan «Agroóndiristegi tsıfrlyq tehnologııalar — turaqty damýdyń negizi» taqyryby erekshe ózektilikke ıe bolyp otyr. Búgin aýyl sharýashylyǵynyń damýyn agrarlyq ǵylym men zamanaýı tsıfrlyq sheshimderdiń jetistikterinsiz elestetý múmkin emes. Dál osy ekeýiniń yqpaldasýy óndiris tıimdiligin arttyrýdyń, salany klımattyq ózgeristerge beıimdeýdiń, tabıǵı resýrstardy saqtaýdyń jáne azyq-túlik qaýipsizdigin qamtamasyz etýdiń mańyzdy shartyna aınalyp otyr, — dedi vıtse-mınıstr.
Tsıfrlyq tehnologııalar agrarlyq sektordyń ajyramas bóligine aınaldy. GPS-navıgatsııasy bar aýyl sharýashylyǵy tehnıkalary, egistik alqaptarynyń elektrondyq kartalary, tyńaıtqyshtar men ósimdikterdi qorǵaý quraldaryn saralap engizý júıeleri sııaqty dálme-dál eginshilik elementteri belsendi túrde engizilýde. Sondaı-aq egistikterdiń jaǵdaıyn jedel baǵalaýǵa, ónimdilikti boljaýǵa jáne táýekelderdi ýaqtyly anyqtaýǵa múmkindik beretin qashyqtan zondtaý jáne spýtnıktik monıtorıng tehnologııalary keńinen qoldanylady.
Aýyl sharýashylyǵy alqaptaryn baqylaýda ushqyshsyz ushý apparattaryn paıdalaný, qurylǵylar men óndiristik protsesterdi avtomattandyrylǵan basqarý júıelerin engizýge erekshe kóńil bólinýde. Mal sharýashylyǵynda janýarlardy elektrondy sáıkestendirý, tsıfrlyq esep júrgizý jáne tabyn ónimdiligin monıtorıngteý tehnologııalary tabysty qoldanylyp otyr.
650-den astam agrokásiporyn óz óndiristik qyzmetinde tsıfrlyq tehnologııalardy paıdalanady. Tsıfrlandyrýdy odan ári yntalandyrý úshin Mınıstrlik memlekettik qoldaý sharalaryn qarastyrǵan. Investıtsııalyq sýbsıdııalaý aıasynda tsıfrlyq basqarý júıelerimen jabdyqtalǵan aýyl sharýashylyǵy tehnıkalaryn, sondaı-aq ushqyshsyz ushý apparattaryn satyp alýǵa ketken shyǵyndardyń bir bóligi óteledi.
Memleket basshysynyń tapsyrmasyna sáıkes, jasandy ıntellekt tehnologııalaryn qosa alǵanda, ınnovatsııalyq sheshimderdi engizýdi memlekettik qoldaý sharalaryn usyný ólshemderiniń biri retinde qarastyrý pysyqtalyp jatyr.
Agrarlyq ǵylymdy tsıfrlyq transformatsııalaý, jer resýrstaryn basqarýdyń aqparattyq júıesin qurý jumystary jalǵasady.
Semınarǵa qatysýshylar agroónerkásiptik keshendi odan ári tsıfrlandyrý perspektıvalaryn, aýyl sharýashylyǵy úshin otandyq tsıfrlyq platformalardy damytý, óndiristik protsesterge jasandy ıntellekt pen úlken derekterdi taldaý tehnologııalaryn engizý máselelerin talqylady. Sondaı-aq ǵylym, bıznes jáne memleket arasyndaǵy ózara is-qımyldy kúsheıtý arqyly ınnovatsııalyq sheshimderdi jedel engizý jáne otandyq agroóndiristiń básekege qabilettiligin arttyrýǵa erekshe nazar aýdaryldy.
Aıta keteıik, elde agrobızneske 1%-dyq jeńildetilgen nesıe berý qaǵıdalary jańartyldy.
