Aýyl sharýashylyǵyn qarjylaı qoldaý qorynyń burynǵy tóraǵasy qamaýǵa alyndy

ASTANA. KAZINFORM – QMA Shymkent qalasy boıynsha departamenti «Aýyl sharýashylyǵyn qarjylaı qoldaý qory» AQ-nyń burynǵy tóraǵasy J.D.Omarovqa qatysty sotqa deıingi tergep-tekserý júrgizýde.

Ol alma baqtaryn salýǵa bólingen bıýdjet qarajatyn ıemdený faktisi boıynsha, qyzmettik ókilettigin paıdalana otyryp, jumystar men jabdyqtardyń qunyn negizsiz kóterý jolymen urlyq jasady degen kúdikke ilindi.

- Bul maqsatta ol ózimen baılanysty «Green Mart Kazakhstan» JShS-niń basshysyn tartqan. Atalǵan tulǵa baǵdarlamaǵa qatysýshy bolyp kóriný úshin dostary men týystarynyń atyna 20 jalǵan kompanııa tirkegen.

Shyn máninde bul tulǵalar eshqandaı qyzmet atqarmaǵan jáne jobaǵa qatyspaǵan.

Jalǵan qujattar negizinde qorǵa 1,4 mlrd teńge kóleminde lızıng alý týraly ótinimder usynylyp, olar keıin qor tarapynan maquldanǵan, - dep jazylǵan aqparatta.

Baıqaý rásimderin ótkizbesten, jetkizýshi retinde bir ǵana qatysýshy — «Green Mart Kazakhstan» JShS tańdalǵan.

Qarajat túsken soń, onyń bir bóligi kásiporyndardyń esepshottaryna aýdarylyp, qolma-qol aqshaǵa aınaldyrylǵan.

Sonymen qatar jabdyqtar qymbat baǵamen jetkizilgen, al jumystar oryndalmaǵan.

Nátıjesinde memleketke keltirilgen zalaldyń jalpy somasy 430 mln teńgeden asty.

AQ-nyq burynǵy tóraǵasy 2 aı merzimge qamaýǵa alyndy.

Qazirgi ýaqytta sotqa deıingi tergeý jalǵasýda.

Buǵan qosa, osy is boıynsha qordyń burynǵy basqarýshy dırektory M.K. Iskakov pen «Green Mart Kazakhstan» JShS basshysy R.B.Sazynbek 8 jylǵa bas bostandyǵynan aıyrylyp, 4 avtokóligi tárkilendi.

Úkim áli zańdy kúshine engen joq.

Aıta keteıik, Shymkentte alaıaqtar bir otbasyǵa 25 mln teńge nesıe alǵyzǵan.