Jambyl oblysynda aýqymdy dala semınary ótti
TARAZ. KAZINFORM – Jambyl oblysynda «Aýyl sharýashylyǵyn damytý» taqyrybynda dala semınary ótti.
Semınar Prezıdenttiń Ulttyq quryltaıdyń IV otyrysynda aýyl sharýashylyǵy salasyna qatysty bergen tapsyrmalaryn talqylaýǵa jáne olardy iske asyrý joldaryn aıqyndaýǵa arnaldy.
Aýyl sharýashylyǵy mınıstri Aıdarbek Saparov qarjylandyrý kólemi jyl saıyn artyp kele jatqanyn atap ótip, sharýalarǵa memlekettik qoldaýdyń tetikterin keńinen túsindirdi.
– Jambyl oblysynda aýyl sharýashylyǵyna jiti kóńil bólinip, veterınarııa salasyna jańashyldyqtar engizilip jatyr. Mal dárigerleri qyzmettik kólikpen qamtylyp, veterınarııalyq pýnktterdiń qurylysy qarqyndy júrgizilip jatyr, – dedi mınıstr.
Oblys ákimi aýyl sharýashylyǵyn damytpaı, básekege qabiletti ekonomıka qurý múmkin emes ekenin alǵa tartyp, eń negizgi mindetterge toqtalyp ótti.
– Memleket basshysy men Úkimettiń qoldaýy aýyl sharýashylyǵy salasynyń damýyna tyń serpin berip otyr. Alda bizdi egistikti tsıfrlandyrý, aýyl sharýashylyǵy tehnıkasyn jańartý, egis alqaptaryn ártaraptandyrý, sýarmaly jerlerdiń kólemin arttyrý, mıneraldy tyńaıtqyshtardy engizý jáne sharýalardy joǵary ónimdi tuqymdarmen qamtamasyz etý syndy aýqymdy mindetter kútip tur. Aýyl sharýashylyǵynyń strategııalyq mańyzyn eskersek, zamanaýı ǵylymı jetistikterdi tıimdi paıdalaný – asa mańyzdy, – dedi Erbol Qarashókeev.
Aýyl sharýashylyǵy basqarmasynyń basshysy Qaırat Kóshenovtiń aıtýynsha, bıyl 48,2 mlrd teńge bólindi, 3,4 myń sharýaǵa memlekettik qoldaý kórsetildi. І toqsan qorytyndysynda 38 mlrd teńgeniń ónimi óndirilip, 4,1 mlrd teńge ınvestıtsııa tartyldy.
Basqarma basshysy kóktemgi dala jumystary, mıneraldy tyńaıtqyshtardy qoldaný, sý únemdeý tehnologııalaryn engizý, tehnıkalardy jańartý jáne ózge de baǵyttar týraly baıandady.
Qazaq eginshilik jáne ósimdik sharýashylyǵy ǵylymı-zertteý ınstıtýtynyń basqarma tóraǵasy Sholpan Bastaýbaeva sharýalarmen tyǵyz yntymaqtastyqta jumys isteýge daıyn ekenin jetkizse, Qazaq jemis-kókónis sharýashylyǵy ǵylymı-zertteý ınstıtýtynyń basqarma tóraǵasy Temirjan Aıtbaev tuqym sharýashylyǵyn damytý jóninde bastama kóterip, naqty baǵyt-baǵdaryn usyndy.
Semınar sońy marapattaý rásimine ulasty. Aýyl sharýashylyǵy mınıstrliginiń «Eńbek ardageri» medali, «Aýyl sharýashylyǵy salasynyń úzdigi» tósbelgisi, oblys ákimdiginiń «Oblysqa sińirgen eńbegi úshin» tósbelgisi, sondaı-aq Qurmet gramotasy men Alǵys hattar saltanatty túrde tabystaldy.
Semınar aıasynda kórme ótip, «QazMeatExport» sharýa qojalyǵynyń egistik alqaby kórsetildi.
Aıdarbek Saparov jańa tıptik úlgide salynǵan veterınarııalyq pýnkti aralap, táýligine 144 myń taýyq etin óńdeıtin kombınattyń qurylys barysyn kórdi. Asa qaýipti Marokko shegirtkesine qarsy hımııalyq kúres sharalaryn baqylady.
Oblysta 40 veterınarııalyq pýnktiń qurylysy júrip jatyr.