Aýyl sharýashylyǵyn aýqymdy qoldaý elimizde buryn-sońdy bolmaǵan – Toqaev
ASTANA. KAZINFORM – Memleket basshysy Qasym-Jomart Toqaev ozyq agroekonomıkaǵa kóshý úshin Úkimettiń naqty josparyn ázirleýdi tapsyrdy.
- Aýyl sharýashylyǵyn jańa deńgeıge kóterý qajet. Bul salaǵa tyń serpin berý úshin memleket sońǵy jyldary reforma júrgizip jatyr. Qomaqty qarajat bólinip jatyr, bıyl sharýalardy qoldaýǵa bir trıllıon teńge jumsaldy. Qajetti nesıeler ýaqytynda berildi. Mundaı aýqymdy qoldaý elimizde buryn-sońdy bolmaǵan. Biraq, agroónerkásiptiń orasan zor áleýetin tolyq ashýǵa bul sharalardyń ázirge jetkiliksiz ekeni anyq. Másele – qarajattyń kóleminde emes, eń bastysy, ony tıimdi paıdalaný qajet. Ozyq agroekonomıkaǵa kóshý úshin Úkimettiń naqty jospary bolýy kerek, - dedi Qasym-Jomart Toqaev Qazaqstan halqyna Joldaýynda.
Memleket basshysy málimdegendeı, qazir aýyl sharýashylyǵy ónimderin tereń óńdeıtin birqatar iri joba júzege asyrylyp jatyr.
- Oǵan otandyq jáne sheteldik ınvestorlar qatysyp jatyr. Investıtsııanyń jalpy kólemi 2 mıllıard dollardan asady. Úsh myńnan astam jumys orny ashylady. Ónimder álemniń kóptegen eline tasymaldanady. Mundaı jobalardyń aýqymyn keńeıtý qajet. Ár aımaqta daıyn ónimdi óndiristen dúken sóresine deıin jetkizetin árbir óńirdiń ereksheligine qaraı birtutas jeli qalyptasýy kerek. Kóptegen aımaqta óndiristiń barlyq satysyn qamtıtyn úzdik agrokásiporyndar bar. Olardy jurtshylyq jaqsy biledi. Bul kásiporyndar tsıfrlandyrý tásilderin jappaı engizý arqyly óndiristiń tıimdiligin áldeqaıda arttyryp jatyr. Úzdik agrokásiporyndar aýyl sharýashylyǵy ónimin shyǵarýdan bastap ony tereń óńdeýge deıin tutas óndiristi tolyǵymen jolǵa qoıyp, zor tabysqa jetip otyr. Sondyqtan osyndaı agroholdıngterdiń tájirıbesin taratý úshin barynsha jaǵdaı jasaǵan jón, - dep naqtylady Prezıdent.
Sondaı-aq Qasym-Jomart Toqaev bul tapsyrma quzyrly mınıstrliktiń jáne qoǵamdyq uıymdardyń mindeti ekenin eske saldy.
Prezıdenttiń aıtýynsha, atalǵan qadam ınnovatsııa men ǵylymı jańalyqtardy aýyl sharýashylyǵynda keńinen qoldanýǵa múmkindik beredi.
Buǵan deıin Memleket basshysy ekinshi, úshinshi AES qurylysyn josparlaýdy qazir bastaý kerektigin aıtqan edi.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.