Aýyl sharýashylyǵymen shuǵyldanam deýshilerdi meılinshe kóbeıtý kerek
ASTANA. KAZINFORM – Aýyl sharýashylyǵy ónimin óńdeýmen belsendi túrde aınalysý kerek, dıqandarǵa jan-jaqty qoldaý kórsetken jón. Bul týraly Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysynda aıtty.
«Men byltyrǵy Joldaýymda osy salaǵa qatysty naqty tapsyrma berdim. Úsh jylda agroónerkásip salasyndaǵy óńdelgen ónimniń úlesin 70 paıyzǵa jetkizý mindeti qoıyldy. Bul baǵytta aýyz toltyryp aıtarlyqtaı jumys jasalyp jatqan joq», - dedi Qasym-Jomart Toqaev.
Prezıdenttiń pikirinshe, qazirgi tańda tek shıkizat óndirisine ǵana senip otyrýǵa bolmaıdy. Aýyl sharýashylyǵy ónimin óńdeýmen belsendi túrde aınalysý kerek.
«Úkimet osy máselege aıryqsha nazar aýdarýǵa tıis. Aýyl sharýashylyǵymen shuǵyldanam deýshiler sanyn meılinshe kóbeıtý kerek. Daqyl túrin kóbeıtip, eginniń shyǵymyn arttyryp jatqan dıqandarǵa jan-jaqty qoldaý kórsetken jón. Sondaı-aq, biryńǵaı jer salyǵyn qoldaný máselesin qaıta qarastyrý qajet. Sebebi, is júzine kelgende, biraz túıtkilder bar. Negizgi talap – salyq tóleýdi jeńildetý ǵana emes. Eń bastysy, sharýalar jerdi tıimdi paıdalanyp, barynsha mol ónim berýge umtylýy kerek», - dedi Memleket basshysy.
Sonymen birge, memlekettik qoldaý sharalaryn «bir tereze» qaǵıdasymen júzege asyrý qajet, ıaǵnı salalyq qarjy ınstıtýttarynyń qyzmetin bir jerge biriktirgen jón.
Agrarlyq nesıe korporatsııasynyń áleýetin arttyryp, oǵan ákimdikterdiń aýyl sharýashylyǵyn sýbsıdııalaý quzyretin berý qajet. Ol úshin agroónerkásip kesheni sýbektilerine jeńildetilgen nesıe jáne sýbsıdııa berý qyzmetterin biryńǵaı tsıfrlyq platformaǵa biriktirý kerek.
«Jalpy, agroónerkásip keshenine aýqymdy reforma jasalýǵa tıis. Naqty aıtqanda, jańa tehnologııalardy engizip, jerdi jáne basqa resýrstardy utymdy paıdalanyp, jeńildikter men sýbsıdııalardyń tıimdiligin arttyrý qajet. Munyń bári, túptep kelgende, aýyl sharýashylyǵyndaǵy eńbektiń ónimdiligin arttyrady, ıaǵnı naqty nátıje beredi», - dedi Qasym-Jomart Toqaev.
