Aýyl sharýashylyǵy joǵary tehnologııalyq ǵylymnyń qoldaýyna muqtaj - senator
ASTANA. KAZINFORM – Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary Ǵylym jáne joǵary bilim mınıstrliginiń basshylyǵymen kezdesti.
Júzdesýge qatysýshylar agrarlyq ǵylymdy damytý jáne ony jetkilikti qarjylandyrý máselesin talqylady, dep habarlaıdy QR Parlamenti Senatynyń baspasóz qyzmeti.
Komıtet tóraǵasy Álı Bektaev óz sózinde Memleket basshysy Qasym-Jomart Toqaevtyń Qazaqstan halqyna Joldaýynda aýyl sharýashylyǵyn nyǵaıtý máselesine erekshe nazar aýdarylǵanyn atap ótti. Sondaı-aq qazirgi kezdegi aýyl sharýashylyǵynyń odan ári ósip-órkendeýin qamtamasyz etý úshin joǵary tehnologııalyq ǵylymnyń qoldaýyna muqtaj sala ekeni aıtyldy. Prezıdent sonymen qatar Ulttyq agrarlyq ǵylymı-bilim berý ortalyǵyn agrotehnologııalyq habqa aınaldyrý mindetin qoıdy.
«Búginde Ulttyq agrarlyq ǵylymı-bilim berý ortalyǵyn tolyqqandy transformatsııalaý jáne ony zertteý isiniń barlyq kezeńi qamtylatyn Agrotehnologııalyq habqa aınaldyrý úshin zańnamalyq ózgerister qajet. Ulttyq agrarlyq ǵylymı-bilim berý ortalyǵynyń negizgi mindetiniń biri – elimizdiń agroónerkásip kesheniniń ınnovatsııalyq damýyn qoldaý jáne onyń ǵylymı negizdemesin jasaý bolyp tabylady. Sondyqtan bul ortalyq pen ǵylymı uıymdardyń jaǵdaıyn elemeýge bolmaıdy», - dedi Álı Bektaev.
«Ulttyq agrarlyq ǵylymı-bilim berý ortalyǵy» KeAQ ókili óz kezeginde agrarlyq ǵylymdy qarjylandyrý máselesi týraly senatorlarǵa aıtyp berdi. UAǴBO agroónerkásip keshenin damytýdyń memlekettik saıasatyn iske asyrý jónindegi 230-dan astam fýnktsııany oryndap keledi. Alaıda, ol enshiles uıymdardyń dıvıdendteri esebinen qarjylandyrylady, degenmen bul ahýal UAǴBO-nyń uzaq merzimdi damýyna jetkiliksiz ári turaqsyz bolyp tabylady jáne qarjy jaǵdaıyn qıyndatady. Eger shuǵyl túrde aldyn alý sharalary qabyldanbasa, onda ortalyqqa UAǴBO qurylymyn ońtaılandyrý jóninde sharalar qabyldaýǵa týra keledi jáne onyń saldary áleýmettik dúmpý týǵyzýǵa jáne Memleket basshysy tapsyrmasynyń oryndaý merziminiń keshigýine ákep soqtyrady.
Sharaǵa sonymen qatar aýyl sharýashylyǵy jáne qarjy mınıstrlikteriniń ókilderi qatysty.
