Aýyl sharýashylyǵy jerleriniń tsıfrlyq kartasy ázirlenip jatyr - Saparov
ASTANA. KAZINFORM – Aýyl sharýashylyǵy jerleriniń tsıfrlyq kartasy ázirlenip jatyr. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.
- Búginde agrarlyq sektordy tsıfrlandyrýdy úsh aqparattyq júıe qamtıdy. Birinshisi – Aýyl sharýashylyǵyn sýbsıdııalaýdyń biryńǵaı memlekettik aqparattyq júıesi salany sýbsıdııalaýdyń barlyq baǵytyn qamtıdy. Ekinshisi — basqarýdyń aqparattyq júıesi — EASÝ. Ol veterınarııalyq jáne fıtosanıtarııalyq qujattardy berýge arnalǵan. Jyl saıyn osy júıe arqyly 2 mıllıonnan astam ruqsat qujaty beriledi. Úshinshisi — Aýyl sharýashylyǵy janýarlaryn birdeılendirý. Onyń negizinde mal sharýashylyǵynda qadaǵalaný qalyptastyrylady. Pılottyq rejımde zerthanalyq zertteýlerdi tsıfrlandyrý, qaýipti aýrý oshaqtaryn tirkeý sııaqty ishki júıeleri jumys istep jatyr, - dedi Aıdarbek Saparov.
Munan bólek, mınıstrdiń aıtýynsha, memlekettik qyzmetterdi avtomattandyrý jumystary jalǵasyp jatyr. Mysaly, derekter bazalaryna júginý negizinde veterınar dárigerdiń qatysýynsyz, maldy ótkizýge arnalǵan anyqtamalardy berý qolǵa alynady. Bul memlekettik qyzmetti alý ýaqytyn jáne buzýshylyqtar sanyn edáýir qysqartady. Ósimdik sharýashylyǵynda da qadaǵalaný júıesi qurylyp jatyr. Ol ónimdilik jáne egis qurylymy jónindegi derekterdi naqty jer ýchaskelerimen baılanystyrady.
- Memleket basshysynyń Joldaýyn iske asyrý maqsatynda ósimdik sharýashylyǵyndaǵy qadaǵalanýdyń negizine jer resýrstarynyń tsıfrlyq kartalary kiretin bolady. Qazirgi ýaqytta aýyl sharýashylyǵy jerleriniń tsıfrlyq kartasy ázirlenip jatyr. Oǵan jer kadastrynyń derekteri, geobotanıkalyq jáne agrohımııalyq zertteýlerdiń nátıjeleri jáne ózge de qabattar engizilýi qajet. Nátıjesinde barlyq jer resýrsy jónindegi málimetterdi qamtıtyn biryńǵaı karta qalyptasady. Osy derekter negizinde jasandy ıntellektti paıdalaný arqyly basqarýshylyq sheshimderdi qabyldaý sapasyn arttyrý múmkin bolady, - dedi ol.
Aıta keteıik, bıyl boljam boıynsha 24 mln tonna astyq bastyrylady.
