Aýyl sharýashylyǵy jerlerin berý tásilderin túbegeıli ózgertý kerek — Joldaý
ASTANA. KAZINFORM — Jasandy ıntellektini qoldanyp, aýyl sharýashylyǵy jerlerine spýtnıkpen monıtorıng jasaýdyń tıimdiligin arttyrý kerek. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.
— Onyń bar ıgiligi eldi damytyp, halyqtyń turmysyn jaqsartýǵa arnalýy kerek. Men ıgerilmeı bos jatqan jáne zańsyz alynǵan aýylsharýashylyǵy jerlerin keri qaıtaryp, ony qaıta bólý týraly tapsyrma berdim. Jer ıesiz qalmaýǵa tıis, jerdi tek qana onyń qadirin biletin azamattarǵa berý kerek. 2022 jyldan beri jalpy aýmaǵy 13,5 mıllıon gektardan astam jer qaıtaryldy. Biraq, ákimdikter sonyń 6 mıllıon gektaryn ǵana jańa jer ıgerýshilerge bólip bergen. Iesin tapqan jer óndiristiń oshaǵyna, ınvestıtsııa kózine, qaınaǵan eńbektiń ortasyna aınalýy qajet. Bul — anyq nárse. Sondyqtan ákimdikter qaıtarylǵan jerdiń bárin kelesi jyldyń ortasyna deıin turaqty aınalymǵa engizýi kerek. Bul shara arqyly jaıylym tapshylyǵy máselesi de sheshilýge tıis, — dedi Qasym-Jomart Toqaev.
Prezıdenttiń aıtýynsha, jalpy, jer qatynastaryna qatysty zańsyzdyq pen qaǵazbastylyqty joıý qajet. Sol úshin aýyl sharýashylyǵy jerlerin berý tásilderin túbegeıli ózgertý kerek. Osyǵan oraı, jerdi bólýge qatysty sheshim tsıfrlyq formatta, elektrondy konkýrstar arqyly qabyldanýǵa tıis. Úkimet jyl sońyna deıin zańnamaǵa tıisti ózgertýler usynýy qajet.
— Bul salada tsıfrlyq tehnologııalardy keńinen qoldaný aıryqsha mańyzdy. Qazirdiń ózinde kosmomonıtorıng jáne geotaldaý júıesi paıdalanylmaı jatqan jerlerdi anyqtap, onyń bárin qaıtarýǵa septigin tıgizip jatyr. Jumysty jalǵastyrý qajet. Jasandy ıntellektini qoldanyp, aýyl sharýashylyǵy jerlerine spýtnıkpen monıtorıng jasaýdyń tıimdiligin arttyrý kerek. Sonyń negizinde jerdiń sapasyna, eginniń shyǵymyna, dándi-daqyldardyń jaı-kúıine jáne qaı jerge qandaı daqyl egilgenine tereń taldaý jasalýǵa tıis. Bul — orman sharýashylyǵyna da qatysty másele. Soltústik Qazaqstan oblysynda 9 myń gektar ormannyń ıesiz jatqany anyqtaldy. Budan bólek, jer resýrstarynyń biryńǵaı tsıfrlyq kartasyn ázirleý kerek. Oǵan kadastrlyq málimetterdi, ınfraqurylymǵa jáne jer qoınaýyn paıdalanýǵa qatysty aqparatty kiriktirý qajet, — dedi Memleket basshysy.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.