Aýyl sharýashylyǵy úshin nesıe alǵan 2 myńdaı adam qarjyny basqa maqsatta paıdalanǵan
ASTANA. KAZINFORM – Qarjy mınıstrligi Іshki memlekettik aýdıt komıtetiniń tóraǵasy Erjan Myńjasarov Ortalyq kommýnıkatsııalar qyzmeti alańynda brıfıng ótkizdi.
Ol baıandamasynda bıyl dástúrli memlekettik aýdıt júrgizý tásilderin ózgertkenderin aıtyp, «Pıramıdalyq aýdıt» tásilin respýblıkalyq bıýdjet baǵdarlamalarynan bastap qarajatty jergilikti oryndaýshylarǵa deıin tolyq tizbek boıynsha synaqtan ótkizgenderin jetkizdi.
– Osy aýdıt nátıjesinde agroónerkásip kesheninde memlekettik qoldaý sharalaryn maqsatsyz paıdalaný faktileri anyqtaldy, olardyń jalpy somasy – 22,8 mlrd teńge, - dedi ol.
Máselen, «Aýyl amanaty» baǵdarlamasy boıynsha elimizde shamamen 2 myń qaryz alýshy 13 mlrd teńge nesıe alǵan. Alaıda bul qarajat aýyl sharýashylyǵyn damytýǵa qatysty bolmaǵan. Sonymen qatar keıbir áleýmettik-kásipkerlik korporatsııalar memleketten alǵan jeńildetilgen bıýdjet nesıesin aýyl sharýashylyǵy taýar óndirýshilerin qarjylandyrýǵa paıdalaný ornyna banktik depozıtterge ornalastyryp, paıyzdyq kiris alǵan. Paıyzdan túsetin tabys 2 mlrd teńgege jetken. Sol sııaqty keıbir keıingi qaryz alýshylar da osyndaı áreketter jasaǵan.
– Memleket agrarlyq sektordy turaqty qoldap keledi. Atap aıtqanda, jeńildetilgen bıýdjet nesıeleri, sýbsıdııalar jáne basqa da kómek sharalaryn bóledi, bul fermerlerge ýaqtyly tuqym, tehnıka, mal azyǵy satyp alýǵa jáne sharýashylyqtaryn damytýǵa múmkindik beredi. Alaıda aýdıt anyqtaǵan faktiler kórsetip otyrǵandaı, keıbir uıymdar men jeke agrarlyq kásipkerlerdiń adal emes áreketteri saldarynan bul qoldaý qarajattary shynaıy muqtajdarǵa tolyq jetpeı jatady, - dedi Erjan Myńjasarov.
Ol sondaı-aq memlekettik aýdıt tıimdiligin arttyrýdyń negizgi baǵyttarynyń biri – baqylaýdy kúsheıtý jáne tsıfrlyq taldaýdy damytý ekenin atap ótti.
– Biz bıýdjet qarajatyn durys paıdalanbaıtyn uıymdardyń jáne keıbir jeke tulǵalardyń bıýdjet qarajatyn zańsyz alý nemese paıdalaný shemalaryn boldyrmaý úshin jańa tehnıkalyq sheshimderdi ázirleýdemiz, onyń ishinde memlekettik qoldaý sharalaryna arnalǵan qarajatqa da qatysty, - dedi tóraǵa.
Eske sala keteıik, 2029 jylǵa deıin «Aýyl amanaty» baǵdarlamasyna 600 mıllıard teńgege jýyq qarajat bólinedi.