Aýyl sharýashylyǵy tutynýshylaryna sý tarıfinen 177 mln teńge ótemaqy qaıtarylady
ASTANA. KAZINFORM — Sý resýrstary jáne ırrıgatsııa mınıstrligi sýarý sýyn paıdalanatyn tutynýshylarǵa qarjyny qaıtarý úshin 18 tabıǵı monopolııa sýbektisiniń tarıfterin ýaqytsha tómendetti.
Vedomstvonyń baspasóz qyzmetiniń málimetinshe, nátıjesinde tutynýshylarǵa jalpy 177 mln teńge ótemaqy qaıtarylady.
Bıyl 15 naýryzda Memleket basshysynyń tapsyrmasymen sýarý sýyna tarıf belgileý jáne retteý mindeti Sý resýrstary jáne ırrıgatsııa mınıstrligine berilgen bolatyn. 1 mamyrdan bastap mınıstrlik kanaldar arqyly sý jetkizý, egistik alqaptaryn sýarý úshin sý berý jáne gıdrotehnıkalyq qurylystar arqyly jerústi sý aǵysyn retteý qyzmetterin memlekettik retteýdi júzege asyra bastady.
Mınıstrlik 2024 jylǵa arnalǵan tarıftik smetalar men ınvestıtsııalyq baǵdarlamalardyń oryndalýy boıynsha tabıǵı monopolııa sýbektileriniń 63 esebin qarap shyqty. Tekserý nátıjesinde bekitilgen josparlardyń tolyq oryndalmaǵany anyqtaldy. Osyǵan baılanysty 18 uıymǵa ýaqytsha ótemdik tarıf engizý týraly sheshim qabyldandy. Bul tarıfter arqyly tutynýshylarǵa 177 mln teńge qaıtarylady. Osy uıymdardyń 16-sy kanaldar arqyly sý berý qyzmetin, al ekeýi gıdrotehnıkalyq qurylystar arqyly jerústi aǵynyn retteý qyzmetin kórsetedi.
— Qazir bul uıymdardyń kópshiliginde ýaqytsha ótemaqy tarıfteri kúshine endi. Bul sharanyń qoldanylý merzimi — bir jyl. Zań boıynsha tabıǵı monopolııa sýbektileri ár jyldyń 1 mamyryna deıin aldyńǵy jyly bekitilgen tarıftik smeta men ınvestıtsııalyq baǵdarlamanyń qalaı oryndalǵany týraly esepti mınıstrlikke tapsyrýy tıis, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin halyqaralyq sarapshylar eldegi sý sharýashylyǵyna baǵa bergeni habarlandy.