Aýyl sharýashylyǵy tehnıkasynyń jeńildikti lızıngin qarjylandyrý kólemi artady
ASTANA. KAZINFORM – Aýyl sharýashylyǵy mınıstrligi fermerlerdi jaqsy tehnıkamen qamtamasyz etýge qatysty túsinik berdi.
«Qazir respýblıkada shamamen 149,8 myń traktor, 38,6 myń astyq jınaý kombaıny, 13,5 myń destelegish, 76,3 myń sepkish, 4,9 myń egis kesheni jáne 219 myń topyraq óńdeý tehnıkasy bar. Mashına parkiniń tozýy 76%. Bul aýyl sharýashylyǵy daqyldarynyń jalpy óniminde ysyrapqa jáne jóndeý jumystaryna ári janar-jaǵarmaı materıaldaryna jumsalatyn qosymsha shyǵyndarǵa ákep soqtyrady. Mınıstrlik jaǵynan mashına-traktor parkin jańartýdy jedeldetý boıynsha ınvestıtsııalyq shyǵyndardy sýbsıdııalaý jáne aýyl sharýashylyǵy tehnıkasyn satyp alýǵa nesıe men lızıng boıynsha paıyzdyq mólsherlemelerdi sýbsıdııalaý sııaqty memlekettik qoldaý sharalary óz tıimdiligin kórsetip otyr. Eger 2017 jyly aýyl sharýashylyǵy tehnıkasy parkin jańartý deńgeıi bar bolǵany 1,9 paıyz bolsa, 2023 jyldyń qorytyndysy boıynsha deńgeı 4,5 paıyzǵa deıin ulǵaıdy. Alaıda bul jetkiliksiz, osyǵan baılanysty Memleket basshysy mashına-traktor parkin jańartý deńgeıin 8-10 paıyzǵa deıin kóterýdi tapsyrdy», - delingen Aýyl sharýashylyǵy mınıstrliginiń Kazinform agenttigine bergen jaýabynda.
Mınıstrlik aqparatyna qaraǵanda, fermerler jaǵynan tehnıkaǵa degen úlken suranysty eskere otyryp, ınvestıtsııalyq shyǵyndardy sýbsıdııalaý jáne kredıtter men lızıng boıynsha syıaqy mólsherlemelerin sýbsıdııalaý baǵdarlamalarynyń bıýdjetteri edáýir artty.
«Sondaı-aq aýyl sharýashylyǵy tehnıkasynyń jeńildikti lızıngin qarjylandyrý kólemin ulǵaıtý máselesi pysyqtalady. Osylaısha, 2023 jyl ishinde 20 mlrd teńge somasyna «QazAgroQarjy» AQ arqyly jem-shóp jınaý tehnıkasynyń jeńildikti lızıngin qarjylandyrý baǵdarlamasy iske asyryldy. Budan bólek, «Jasyl damý» AQ qorynan aýyl sharýashylyǵy tehnıkasynyń jeńildikti lızıngine Úkimettiń sheshimimen 20 mlrd teńge baǵyttaldy. Atalǵan baǵdarlamalar boıynsha aýyl sharýashylyǵy tehnıkasy 7-10 jyl merzimge jyldyq 6 paıyzben lızıngke satylady. Bıyl «QazAgroQarjy» AQ-ny odan ári qarjylandyrý úshin 2024 jylǵy respýblıkalyq bıýdjetten aýyl sharýashylyǵy tehnıkasy men jabdyqtaryn lızıngke 6 paıyzdan aspaıtyn jeńildikti mólsherleme boıynsha satyp alýdy qarjylandyrý úshin 100 mlrd teńge mólsherinde qarajat bólý boıynsha is-sharalar eskerilgen. Qazirgi kezde atalǵan joba boıynsha ınvestıtsııalyq usynys QR Ulttyq ekonomıka mınıstrliginen oń ekonomıkalyq qorytyndy aldy. Bul rette joǵaryda atalǵan is-sharanyń tıisti qarjylyq-ekonomıkalyq negizdemesi ázirlenip jatyr. Barlyq bıýdjettik rásimder júrgizilip, kelisilgennen keıin, aýyl sharýashylyǵy tehnıkasyn lızıngke qarjylandyrýdy qamtamasyz etý josparlanǵan», - dep atalyp ótken vedomstvo málimetinde.
