Sý basqan óńirlerde 30 myńǵa jýyq mal qaýipsiz jerge aıdaldy

ASTANA. KAZINFORM – QR Aýyl sharýashylyǵy mınıstrligi sý tasqynyna baılanysty málimdeme jasady, dep habarlaıdy Úkimettiń baspasóz qyzmeti.

Baspasóz qyzmetiniń málimetterine qaraǵanda, sý tasqynyna qarsy is-sharalardy úılestirý jáne sý tasqyny kezeńiniń saldaryn joıý jónindegi respýblıkalyq shtab sheńberinde Aýyl sharýashylyǵy mınıstrligi arqyly kelesi jumystar júrgizilýde.

Mınıstrdiń mal sharýashylyǵy jáne veterınarııa máseleleri jónindegi orynbasary mınıstrliktiń jáne onyń aýmaqtyq bólimsheleri men oblystar ákimdikteriniń is-qımyldaryn úılestirý jónindegi tikeleı tulǵa retinde bekitildi, QR AShM komıtetteriniń aýmaqtyq bólimsheleriniń basshylary oblystyq shtabtardyń quramyna engizilgen.

Sý basqan óńirlerdegi mal óliminiń aldyn alý maqsatynda maldy qaýipsiz jaıylym oryndaryna kóshirý jumystary uıymdastyryldy. Jedel derekter boıynsha shamamen 30 myń bas mal qaýipsiz jerge aıdaldy.

Sonymen qatar qaýip-qaterdiń áli de seıilmeı otyrǵanyna jáne sý tasqynynyń boljamdy ekinshi tolqynyna baılanysty jergilikti atqarýshy organdar halyqty aqparattandyrý jáne qaýipti jerlerden maldy aldyn ala aıdap áketý boıynsha jumystardy júrgizýde.

Ókinishke qaraı, sý tasqynyna baılanysty mal shyǵynynan qutylý múmkin bolmaı otyr. Sondyqtan qazir ólgen mal sany eseptelip, derekter naqtylanýda.

Epıdemıologııalyq qaýip-qaterdi azaıtý úshin óńirlerde «Respýblıkalyq epızootııaǵa qarsy otrıad» RMM mamandary jumys istep jatyr. Aýyl sharýashylyǵy mınıstrliginiń vedomstvolyq baǵynysty uıymynyń balansynda tehnıka, dezınfektsııalaý quraldary, otyn qory, sondaı-aq ólgen mal ólekselerin joıatyn ınsıneratorlar bar. Sý tartylǵannan keıin Mınıstrliktiń epızootııaǵa qarsy otrıady oblystardyń ákimdikterimen birlesip ólgen janýarlardy jınap, joıýǵa kirisedi.

QR AShM qyzmetkerleri ózderiniń tikeleı mindetterin oryndaýmen qatar, sý tasqynyna qarsy kúres jáne olardyń zardaptaryn joıý jumystaryna jumyldyrylǵan.

Sý tasqyny saldarynan TJ rejımi kezinde mal ólgen jaǵdaıda ótemaqy jergilikti bıýdjetterden, sondaı-aq basqa da qarjy kózderinen tólenetin bolady.

Sý basqan oryndardan aıdalǵan mal basyna azyq jetispegen jaǵdaıda, «Azyq-túlik korporatsııasy» ulttyq kompanııasy» AQ fermerlerdiń ótinimderi boıynsha tólemderdi keıinge qaldyrý shartymen malǵa azyq jetkizýdi uıymdastyrýǵa múmkindigi bar. Ol úshin oblystyq shtabqa tómendegi nómirler arqyly habarlasý qajet:

• Astana - 7172 24-51-47, 74-22-79
• Almaty - 8-707-112-64-41
• Shymkent - 7252 33-74-78
• Abaı oblysy - 7222 56-15-15, 56-37-59
• Almaty oblysy - 72772 2-61-02, 2-61-51
• Aqmola oblysy - 7162 52-55-18
• Aqtóbe oblysy - 7132 97-24-67
• Atyraý oblysy - 7122 45-00-00
• ShQO - 7232 57-00-29, 57-00-35
• Jetisý oblysy - 7282 22-15-91, 22-38-52
• Jambyl oblysy - 7262 45-68-29, 45-17-43
• BQO - 7112 51-42-22
• Qaraǵandy oblysy - 7212 43-36-36, 43-37-37
• Qyzylorda oblysy - 7242 24-41-61, 24-58-30
• Qostanaı oblysy - 7142 50-07-44, 50-04-55
• Mańǵystaý oblysy - 7292 70-17-07
• Pavlodar oblysy - 7182 32-36-92, 53-57-49
• SQO - 7152 52-24-54, 52-21-72
• Túrkistan oblysy - 72533 5-99-96
• Ulytaý oblysy + 7 102 72-11-65

Aıta ketsek, Aqtóbe oblysynda 3 myńǵa jýyq maldyń tasqynǵa shydas bermeı sýmen qosa aǵyp ketkeni, sýda qalǵany anyqtalǵan.