Aýyl sharýashylyǵy sanaǵynyń onlaın kezeńi 20 qyrkúıekke deıin uzartyldy
ASTANA.KAZINFORM - Úkimette vıtse-premer – Ulttyq ekonomıka mınıstri Serik Jumanǵarınniń tóraǵalyǵymen ótken keńeste Ulttyq aýyl sharýashylyǵy sanaǵynyń barysy qaraldy, - dep jazdy Primeminister.kz
Ulttyq statıstıka bıýrosynyń málimetinshe, 2025 jylǵy 28 tamyzdaǵy jaǵdaı boıynsha Sanaq.gov.kz platformasynda 236,9 myń aýyl sharýashylyǵy qurylymy tirkelgen. Onyń ishinde 226,2 myńy nemese Bıýronyń josparynda kórsetilgenderdiń 85,3%-y saýalnamadan ótken.
Jalpy aýyl sharýashylyǵy óndirýshileriniń ishinde esep bergenderdiń úlesi – 75,4%, al onyń ishinde belsendi jumys istep turǵandary – 82,2%.
Bıýro basshysy Maqsat Turlybaevtyń aıtýynsha, sanaqtyń jalpy tizimine barlyq sýbekt, tipti sońǵy birneshe jyl boıy esh málimet bermegender de engizilgen. Mundaı kásiporyndardyń sany 13 myńnan asady (barlyq tizimniń 4,5%-y).
Jeke qosalqy sharýashylyqtar arasynda saýalnamaǵa 277,9 myń úı sharýashylyǵy qatysqan, bul josparlanǵan kórsetkishten 1,5 ese artyq. Eń joǵary belsendilik Qostanaı, Soltústik Qazaqstan jáne Batys Qazaqstan oblystarynda baıqalyp otyr. Al Túrkistan men Qaraǵandy oblystary, sondaı-aq respýblıkalyq mańyzy bar qalalar qalys qalyp keledi. Osyǵan oraı onlaın kezeńdi tek uıymdasqan sharýashylyqtar úshin ǵana 20 qyrkúıekke deıin uzartý usynyldy, bul agrarlyq sharýashylyqtardy tolyq qamtyp, oflaın sanaq kezeńine zııan keltirmeýge baǵyttalǵan.
Jalpy alǵanda, onlaın kezeń sharýalardyń qyzyǵýshylyq tanytqanyn jáne birqatar óńirde statıstıkterdiń ákimshiliktermen ózara tıimdi is-qımyl jasaǵanyn kórsetti.
20 qyrkúıekten bastap eń kúrdeli kezeń – dalalyq sanaq bastalady. Ol bir aıǵa sozylyp, 20 qazanǵa deıin jalǵasady. Bul kezeńde ıntervıýerler sharýashylyqtardy aralap, jeke suhbat formatynda málimet jınaıdy.
– Bul kezeńde senimdi dıalog ornatyp, barynsha shynaıy derekter alý mańyzdy, - dedi óńirlerge qarata aıtqan sózinde Maqsat Turlybaev.
Keńes otyrysyn qorytyndylaı kele, Serik Jumanǵarın onlaın kezeńde sharýalardyń joǵary ynta tanytqany qýantatynyn atap ótti.
– Bárimiz aýyl sharýashylyǵyndaǵy statıstıkany retke keltirýdiń qanshalyqty mańyzdy ekenin jaqsy túsinemiz. Buǵan memlekettik qoldaý sharalary, salanyń damý josparlary, salyq túsimderiniń boljamy jáne basqa da máseleler baılanysty. Onlaın kezeńde sharýalardyń joǵary belsendiligi qýantady. Dalalyq jumysta da jaqsy nátıjeler kútemin, – dedi vıtse-premer.
Aıta keteıik, aýyl sharýashylyǵy sanaǵyna daıyndyq sharalary sheńberinde úı sharýashylyqtaryn aldyn ala aralaý (lıstıng) kezeńi aıaqtaldy.