Aýyl sharýashylyǵy sanaǵynyń alǵashqy kúni 5 myńǵa jýyq respondent qatysty

ASTANA. KAZINFORM — 1 tamyzda Qazaqstanda Ulttyq aýyl sharýashylyǵy sanaǵynyń onlaın kezeńi bastaldy.

Ulttyq statıstıka bıýrosynyń málimetinshe, alǵashqy kúni 4,9 myńnan astam adam sanaq.gov.kz saıtynda saýalnama paraǵyn toltyrdy.

Qatysýshylardyń arasynda fermerler de, jeke qosalqy sharýashylyq ıeleri de bar. Saıtta saýalnamanyń eki nusqasy jarııalanǵan.

Birinshisi – aýyl sharýashylyǵy kásiporyndary, fermerlik/sharýa qojalyqtary, dara kásipkerler úshin, ekinshisi – jer telimi bar ne mal ustaıtyn úı sharýashylyqtaryna arnalǵan.

Týyndaǵan suraqtar boıynsha Sanaq myrza chat-botyna jazýǵa nemese 1446 baılanys ortalyǵyna qońyraý shalýǵa bolady. Saýalnama toltyrýǵa arnalǵan beınenusqaýlyqtar da bar. Onlaın kezeń 31 tamyzǵa deıin jalǵasady.

20 qyrkúıekten bastap sanaqtyń ekinshi kezeńi ótedi, bul kezeńde ıntervıýerler úı-úıdi aralaıtyn bolady. Aıta ketý kerek, barlyq usynylǵan aqparat qatań qupııa saqtalady. Málimetter tek statıstıkalyq maqsatta qoldanylady jáne salyq organdaryna nemese ózge de memlekettik mekemelerge berilmeıdi.

Al aýyl sharýashylyǵy sanaǵyna qatyspaýǵa bola ma degen saýalǵa jaýap alǵyńyz kelse, myna siltemege ótińiz.