Aýyl sharýashylyǵy sanaǵyna onlaın 390 myń respondent qatysty

ASTANA. KAZINFORM — Qazaqstanda aýyl sharýashylyǵy sanaǵynyń onlaın kezeńi jalǵasyp jatyr. Sanaq.gov.kz saıtyndaǵy saýalnamalardy toltyrý 31 tamyzda aıaqtalady.

Onlaın kezeń bastalǵaly beri 390 myńnan astam respondent saýaldarǵa jaýap berdi. Olardyń 183 myńnan astamy – aýyl sharýashylyǵymen aınalysatyn zańdy tulǵalar, sharýa jáne fermer qojalyqtary, sondaı-aq jeke kásipkerler. Taǵy shamamen 207 myńy – jeke úı sharýashylyqtary. 

– Aýyl sharýashylyǵy sanaǵynyń onlaın kezeńiniń aıaqtalýyna 10 kúnnen az ýaqyt qaldy. Barlyq agrarshylardy, fermerlerdi jáne aýyl sharýashylyǵy ónimin óndirýshilerdi sanaqqa jaýapkershilikpen qaraýǵa, saýalnamadan múmkindiginshe tez ótýge shaqyramyz. Kompıýter nemese ınternetke qoljetimdiligi joq azamattar úshin respýblıka boıynsha aýyldyq ákimdikterde 2 700 ózine-ózi qyzmet kórsetý aımaǵy jumys istep tur. Onda arnaıy oqytylǵan mamandar kómek kórsetedi. Azamattarymyzdyń sanaly áreketine senemiz jáne aýyl sharýashylyǵyna qatysy bar árbir adamnyń belsendi qatysatynyna úmittenemiz, – dedi Ulttyq statıstıka bıýrosy basshysynyń orynbasary Ásel Sháýenova.

Aýyl sharýashylyǵy sanaǵy elimizdiń agrarlyq salasynyń jaǵdaıyn tolyq kórýge, paıdalanylyp jatqan aýyl sharýashylyǵy alqaptarynyń kólemin, ósirilip jatqan daqyl túrlerin, mal basynyń sanyn, tehnıkamen jabdyqtalýyn, eńbek resýrstaryn jáne basqa da kórsetkishterdi anyqtaýǵa múmkindik beredi. Aýyl sharýashylyǵy qurylymdary úshin saýalnamada 29 suraq, al úı sharýashylyqtary úshin 23 suraq qarastyrylǵan.

Ortasha eseppen saýalnamany toltyrýǵa 15–20 mınýt ýaqyt jumsalady. Barlyq berilgen aqparat qupııa saqtalady jáne úshinshi tulǵalarǵa berilmeıdi. 

Buǵan deıin baılanys ortalyǵy aýyl sharýashylyǵy sanaǵy aıasynda 8 myńnan astam ótinish qabyldanǵanyn jazǵan edik.