Aýyl sharýashylyǵy sanaǵyna bólingen qarjynyń 800 mln teńgesi bıýdjetke qaıtaryldy

ASTANA. KAZINFORM – Strategııalyq josparlaý jáne reformalar agenttiginiń Ulttyq statıstıka bıýrosy Kazinform saýalyna joldaǵan jaýapta byltyr júrgizilgen aýyl sharýashylyǵy sanaǵynan qansha qarajat únemdelgenin málim etti. 

- 2025 jyly Ulttyq aýyl sharýashylyǵy sanaǵyn ótkizýge 3,7 mlrd teńge bólingen. Onyń ishinde ıgerilgen soma - 2,9 mlrd teńge, ıaǵnı 78%. Bıýdjet qarajatyn únemdeý sanaq.gov.kz arnaıy daıyndalǵan platformasynda saýalnamadan óz betinshe ótýge belsendi qatysqan aýyl sharýashylyǵy óndirýshileri men jeke qosalqy sharýashylyqtardyń arqasynda qamtamasyz etildi. Bul negizgi zertteý kezeńinde ıntervıýerlerdi tartý qajettiligin azaıtýǵa múmkindik berdi, ıaǵnı 1-31 tamyz aralyǵynda onlaın ózin-ózi toltyrýdan ótken respondentterdiń esebinen bolyp otyr, - dep jazylǵan jaýapta.

Agenttiktiń málimeti boıynsha, onlaın saýalnamaǵa aýyl sharýashylyǵy qurylymynyń 91,3%-y, jeke qosalqy sharýashylyqtarynyń 19,3%-y qatysqan. Qalǵan respondentter oflaın-saýalnama arqyly qamtylǵan.

- Igerilgen qarajattyń jalpy kóleminen tartylǵan adamdardyń eńbegine aqy tóleý - 57%. Aýyl sharýashylyǵy sanaǵyn ótkizý qorytyndysy boıynsha sanaqqa qatysqan ıntervıýerlerge syıaqy tólengen joq. Igerilmegen qarajat belgilengen tártipke sáıkes respýblıkalyq bıýdjetke qaıtaryldy, - dep jazady bıýro mamandary.

Eske salaıyq, atalǵan sanaq byltyr 21 qazanda aıaqtalǵan bolatyn.