Aýyl sharýashylyǵy sanaǵy kezinde qandaı suraqtar qoıylady

ASTANA. KAZINFORM — 1-31 tamyz aralyǵynda Qazaqstanda Ulttyq aýyl sharýashylyǵy sanaǵynyń birinshi kezeńi ótedi. Bul týraly Ulttyq statıstıka bıýrosy málim etti. 

Osy ýaqyt aralyǵynda barlyq qatysýshy sanaq.gov.kz saıtynda onlaın formatta sanaqtan óte alady.

Ósimdik sharýashylyǵymen, mal sharýashylyǵymen nemese balyq sharýashylyǵymen aınalysatyn zańdy tulǵalar, jeke kásipkerler men sharýa (fermer) qojalyqtary 2-AShK/ShFQ sanaq paraǵyn toltyrýy tıis. Bul saýalnama toǵyz bólimnen turady jáne 29 suraqty qamtıdy. Onda jer ýchaskeleriniń kólemi, olardyń qalaı paıdalanylyp jatqany, sýarý tásilderi, jerdiń menshikke nemese jalǵa alynǵany týraly málimetter kórsetilýi kerek.

Baqsha egetin nemese mal men qus ustaıtyn úı sharýashylyqtary da sanaqqa qatysady. Olar úshin 3-JQSh saýalnama paraǵy qarastyrylǵan. Bul saýalnamada qandaı daqyldar ósiriletini, qansha mal men qus ustaıtyny, jaıylymdardy qoldanatyny, mal ustaýǵa arnalǵan qurylystardyń bar-joǵy, sondaı-aq ónimniń satylatyny nemese jek tutynýǵa paıdalanylatyny týraly málimet beriledi. Úı sharýashylyqtaryna arnalǵan saýalnama 8 bólimnen jáne 22 suraqtan turady.

Eske sala keteıik, barlyq usynylatyn aqparattyń qupııalylyǵy saqtalady, derekter «Memlekettik statıstıka týraly» zańymen qorǵalady jáne salyq nemese basqa memlekettik organdarǵa berilmeıdi.

Sanaq aıasynda Bıýro elimiz boıynsha shamamen 300 myń aýyl sharýashylyǵy uıymyn jáne 2 mln úı sharýashylyǵyn qamtýdy josparlap otyr.

Eske sala keteıik, buǵan deıin aýyl sharýashylyǵy sanaǵyna daıyndyq sharalary sheńberinde úı sharýashylyqtaryn aldyn ala aralaý (lıstıng) kezeńi aıaqtalǵanyn jazǵan edik. Stat bıýronyń dereginshe, respýblıka boıynsha bir aı ishinde 70 qalada tıisti jumystar júrgizilgen. Osy ýaqyt ishinde Ulttyq statıstıka bıýrosynyń ıntervıýerleri 300 myńnan astam úıdi aralap, sharýashylyqpen aınalysatyndardyń mekenjaıyn naqtylaǵan bolatyn.