Aýyl sharýashylyǵy sanaǵy: Eń kóp ıntervıýer Túrkistan oblysynda jumys isteıdi

ASTANA. KAZINFORM — Túrkistan oblysynda Ulttyq aýyl sharýashylyǵy sanaǵynyń oflaın kezeńi aıasynda 441 ıntervıýer jumys atqaryp jatyr — bul elimiz boıynsha eń joǵary kórsetkish, dep habarlaıdy Ulttyq statıstıka bıýrosy.

Jalpy Qazaqstan boıynsha 3,2 myńnan astam ıntervıýer sanaq jumysyna tartylǵan.

Kún saıyn ıntervıýerler aýyl-aımaqty aralap, turǵyndarmen saýalnama júrgizip jatyr. Túrkistan oblysynda sanaqpen 804 eldi meken, 177 aýyldyq okrýg jáne 7 qala qamtylǵan.

Búginde óńirdegi úı sharýashylyqtarynyń 96%-y sanaqtan ótti. Túrkistan oblysy — eldegi eń halqy tyǵyz ornalasqan óńir, munda barlyǵy 262 myń úı sharýashylyǵy bar, al respýblıka boıynsha olardyń jalpy sany 1,6 mln.

Ulttyq statıstıka bıýrosynyń basshysy Maqsat Turlybaev jumys sapary barysynda óńirdegi ıntervıýerlerdiń qyzmetimen tanysty.

— Halyqpen jumys — eń kúrdeli mindetterdiń biri. Kún saıyn dál osy ıntervıýerler turǵyndarmen tikeleı baılanys ornatyp, sanaqtyń maqsatyn túsindiredi jáne mańyzdy derekterdi jınaıdy. Túrkistan oblysynda aýyl halqynyń úlesi joǵary bolǵandyqtan, biz ıntervıýerlerdi muqııat daıyndap, barlyq qajetti qural-jabdyqtarmen qamtamasyz ettik. Olarǵa planshet, arnaıy forma, qorǵanys quraldary men ıtterdi jolatpaý qurylǵylary berildi, — dedi ol.

Sonymen qatar jergilikti ákimdikter sanaqtyń uıymdastyrylýyna belsendi qoldaý kórsetip otyr, olar túsindirý jumystaryn júrgizip, turǵyndarǵa ıntervıýerlerdiń keletinin aldyn ala habarlaıdy. Bul saýalnama protsesin tynysh ári qaýipsiz ótkizýdi qamtamasyz etedi.

Eske salaıyq, aýyl sharýashylyǵy sanaǵynyń oflaın kezeńi 20 qazanǵa deıin jalǵasady. Intervıýerler úı-úıdi aralap, tórt túliktiń, jer ýchaskeleriniń, baý-baqshanyń jáne basqa da sharýashylyq qyzmet túrleriniń bar-joǵy týraly derekter jınaıdy. Barlyq suraq boıynsha turǵyndar 1446 baılanys ortalyǵyna tegin qońyraý shala alady.

Budan buryn Túrkistan oblysynda 160-qa jýyq nusqaýshy jumysqa qabyldanǵanyn jazdyq.