Aýyl sharýashylyǵy sanaǵy: Derek berýden bas tartqandarǵa qandaı jaza bar

ASTANA. KAZINFORM – Aýyl sharýashylyǵy sanaǵy kezinde málimet berýden bas tartqan nemese qate málimet bergen adamdar ákimshilik jaýapqa tartylady. Bul týraly Ulttyq statıstıka bıýrosy Kazinform agenttiginiń resmı saýalyna joldaǵan jaýapta aıtylǵan.

— «Memlekettik statıstıka týraly» QR Zańynyń 21-baby 5-tarmaǵyna sáıkes ulttyq sanaqtardy júrgizý kezinde bastapqy statıstıkalyq derekterdi respondentter mindetti túrde usynady. Zańnyń 1-babynyń 3-4-tarmaqshasyna sáıkes bastapqy statıstıkalyq derekter – statıstıkalyq nysandarda alynǵan nemese tirkelgen derekter. «Ákimshilik quqyq buzýshylyq týraly» Kodekstiń 719-babyna sáıkes memlekettik statıstıka salasyndaǵy ýákiletti organ osy Kodekstiń 497-babynda (bastapqy statıstıkalyq derekterdi berý tártibin buzý) kózdelgen ákimshilik quqyq buzýshylyq týraly isterdi qaraıdy, - delingen habarlamada.

Atalǵan 497-babqa sáıkes, bastapqy statıstıkalyq derekterdi usyný tártibin buzǵandarǵa mynandaı jaza qarastyrylǵan:

1. Memlekettik statıstıkanyń tıisti organdaryna anyq emes bastapqy statıstıkalyq derekterdi usynǵandarǵa eskertý jasalady.
2. Memlekettik statıstıkanyń tıisti organdaryna bastapqy statıstıkalyq derekterdi belgilengen merzimde usynbaý: jeke tulǵalarǵa – 10, laýazymdy adamdarǵa, kommertsııalyq emes uıymdarǵa, shaǵyn kásipkerlik sýbektilerine – 14, orta kásipkerlik sýbektilerine – 20, iri kásipkerlik sýbektilerine 120 aılyq eseptik kórsetkish mólsherinde aıyppul salýǵa ákep soǵady.
3. Osy baptyń birinshi jáne ekinshi bólikterinde kózdelgen, ákimshilik jaza qoldanylǵannan keıin bir jyl ishinde qaıtalap jasalǵan is-áreketter: jeke tulǵalarǵa – 14, laýazymdy adamdarǵa, kommertsııalyq emes uıymdarǵa, shaǵyn kásipkerlik sýbektilerine – 20, orta kásipkerlik sýbektilerine – 40, iri kásipkerlik sýbektilerine bir júz elý aılyq eseptik kórsetkish mólsherinde aıyppul salýǵa ákep soǵady.

Sonymen qatar, bıýro mundaı jaǵdaıdy boldyrmas úshin sanaq aldynda jergilikti ákimdiktermen birlese túsindirý jumystary júrgiziletinin málimdedi.

— Bastapqy statıstıkalyq derekterdi usyný merzimderi statıstıkalyq nysandardyń tıtýldyq betterinde kórsetiledi. Aýyl sharýashylyǵy sanaǵy barysynda úı sharýashylyqtarynan alynatyn derekterdiń mańyzdylyǵyn eskere otyryp, ákimshilik jaýapkershilikke tartý faktilerin boldyrmaý maqsatynda jergilikti atqarýshy organdar ókilderiniń qatysýymen aqparattyq jáne quqyqtyq túsindirý jumystary júrgiziledi, - delingen habarlamada.

Aıta keteıik, byltyr 54 eldi mekende pılottyq aýyl sharýashylyǵy sanaǵy ótkizildi. Sonda úı sharýashylyqtarynyń shamamen 2%-y saýalnamaǵa qatysýdan bas tartqan bolatyn.