Aýyl sharýashylyǵy salasyna ınvestıtsııa artyp keledi: 683 joba iske asyrylmaq
ASTANA. KAZINFORM — 2025–2027 jyldarǵa arnalǵan AÓK damytý jónindegi Jol kartasy aıasynda jalpy somasy 3,4 trln teńge bolatyn 683 ınvestıtsııalyq jobany iske asyrý josparlanǵan.
Aýyl sharýashylyǵy mınıstri Aıdarbek Saparov 2025 jyldyń birinshi jartyjyldyǵyndaǵy agroónerkásiptik keshenniń damý qorytyndylary boıynsha keńes ótkizdi. Keńeske AShM qurylymdyq bólimsheleriniń basshylary, oblystar ákimderiniń orynbasarlary, óńirlik aýyl sharýashylyǵy jáne veterınarııa basqarmalarynyń ókilderi qatysty.
Kún tártibindegi negizgi máselelerdiń biri — baǵdarlamalyq kórsetkishterdiń oryndalýy, ásirese mal azyǵyn daıyndaý, veterınarııalyq qaýipsizdikti qamtamasyz etý jáne salanyń ınvestıtsııalyq belsendiligin arttyrý boldy.
Aýyl sharýashylyǵy vıtse-mınıstri Ermek Kenjehanulynyń málimetinshe, búgingi tańda oblystardyń derekteri boıynsha 13,2 mln tonna shóp daıyndalǵan, bul jospardyń 53,8%-y. Mal azyǵyn daıyndaý qarqyny boıynsha Soltústik Qazaqstan, Qostanaı, Aqmola jáne Jambyl oblystary alda keledi. Al Ulytaý, Qyzylorda, Atyraý jáne Qaraǵandy oblystary artta qalyp otyr.
Osyǵan baılanysty óńirlerge ózara yntymaqtastyqty kúsheıtý, soltústik aımaqtarda shóp shabýdy uıymdastyrý, sondaı-aq jemshóp baǵasyn baqylaýdy qamtamasyz etý jáne negizsiz qymbattaýǵa jol bermeý tapsyryldy.
Agroónerkásiptik keshenge ınvestıtsııa tartý basym baǵyttardyń biri bolyp qala beredi. 2025 jyldyń birinshi jartyjyldyǵynyń qorytyndysy boıynsha AÓK negizgi kapıtalyna salynǵan ınvestıtsııa kólemi 616,6 mlrd teńgeni qurady. Onyń ishinde 442,7 mlrd teńge aýyl jáne balyq sharýashylyǵyna, 104,2 mlrd teńge — azyq-túlik ónimderi óndirisine, 69,7 mlrd teńge — sýsyndar óndirisine baǵyttaldy.
Investıtsııa tartý boıynsha eń jaqsy kórsetkishterge Shymkent qalasy, Almaty qalasy, Aqtóbe, Soltústik Qazaqstan, Túrkistan, Almaty, Aqmola jáne Abaı oblystary qol jetkizdi. Al Astana qalasy, Shyǵys Qazaqstan, Atyraý, Mańǵystaý jáne Ulytaý oblystarynda qarjy ıgerý deńgeıi tómen bolyp otyr.
2025–2027 jyldarǵa arnalǵan AÓK damytý jónindegi Jol kartasy aıasynda jalpy somasy 3,4 trln teńge bolatyn 683 ınvestıtsııalyq jobany iske asyrý josparlanǵan. Búgingi kúni Túrkistan, Almaty jáne Qostanaı oblystarynda 50-den astam joba paıdalanýǵa berildi.
— Salaǵa 2 trln teńgeden astam ınvestıtsııa tartý jumysyn jandandyrý qajet. Ákimdikter Jol kartasynyń oryndalýyn jáne 2025 jylǵa josparlanǵan jobalardyń iske qosylýyn qamtamasyz etýi mańyzdy, — dep atap ótti Aıdarbek Saparov.
Keńeste balyq sharýashylyǵyn damytý, janýarlardy ýaqtyly vaktsınatsııalaý, qulaq japsyrmalaryn satyp alý jáne maldy sáıkestendirý máseleleri de qaraldy. Óńirlerdegi veterınarııalyq pýnktterdiń basym bóligi áli kúnge deıin qajetti ınfraqurylymmen qamtamasyz etilmegeni aıtyldy.
Bıylǵy jyly 758 veterınarııalyq nysan salý josparlanǵan, onyń ishinde 428 veterınarııalyq pýnkt, 233 mal qorymy jáne 97 soıý pýnkti bar.
Keńes qorytyndysynda mınıstr barlyq deńgeıdegi bılik organdarynyń úılesimdi jáne jaýapty jumysynyń mańyzdylyǵyn atap ótti:
— Birlesken kúsh-jiger men naqty úılestirý arqyly ǵana biz elimizdiń agroónerkásiptik kesheniniń turaqty damýyn qamtamasyz ete alamyz. Bizdiń jumysymyzdyń tıimdiligi Qazaqstannyń azyq-túlik qaýipsizdigine tikeleı baılanysty, — dedi Aıdarbek Saparov.
Aıta ketelik Qazaqstanda qyzylsha óńdeıtin iri zaýyt salynatyny týraly jazǵan edik.