Aýyl sharýashylyǵy ónimderin qaıta óńdeýdi damytýdyń keshendi jospary qabyldandy

ASTANA. KAZINFORM — Bıyl elimizde azyq-túlik óndirisin 4,5%-ǵa arttyrý jospary qoıyldy. Aldaǵy jospar týraly Aýyl sharýashylyǵy mınıstriniń orynbasary Ermek Kenjehanuly aıtyp berdi.

— Aýyl sharýashylyǵy salasyn odan ári damytý maqsatynda mınıstrlik oblys ákimdikterimen birlesip kelesi mindetti oryndaý úshin sharalar qabyldap jatyr. Sonyń biri egistik alqaptardyń qurylymyn ártaraptandyrý qajet, ıaǵnı monodaqyl — bıdaı jáne sýarmaly daqyldar alqabyn qysqartyp, onyń ornyna kirisi joǵary daqyldardy kóbeıtý qajet. Basty nazar agrotehnologııalardy saqtaýǵa, tyńaıtqyshtardy jetkilikti kólemde engizýge, ósimdikterdi qorǵaý quraldaryn qoldanýǵa jáne tehnıkany jańartýǵa aýdarylady, — dep sendirdi Ermek Kenjehanuly elordada ótip jatqan dóńgelek ústel barysynda.

Sonymen qatar vıtse-mınıstr Úkimet ekonomıka ósimin 7%-ǵa jetkizý mindetin qoıǵanyn aıtty. 

— Onyń ishinde joǵary qosylǵan quny bar salalardy ilgeri damytyp, qarjylandyrýǵa basymdyq beriledi. Osyǵan baılanysty, 2025 jyly azyq-túlik óndirisin 4,5%-ǵa arttyrý josparlanyp otyr. Sonymen qatar aýyl sharýashylyǵy ónimderin qaıta óńdeýdi damytý jónindegi 2028 jylǵa deıingi keshendi jospar qabyldandy. Bul jospar qaıta óńdeýdi qoldaýdyń jańa sharalaryn, jańa ótkizý naryqtaryn ashýdy, sondaı-aq otandyq qaıta óńdeýmen aınalysatyn kásipkerlerdi qoldaý úshin qorǵaý sharalaryn engizýdi qarastyrady, — deıdi mınıstrdiń orynbasary. 

Buǵan deıin Ermek Kenjehanuly byltyr aýyl sharýashylyǵy ónimderi kólemi 13,7%-ǵa artyp, sala úshin rekordtyq maýsym bolǵanyn aıtqan edi. 

Aıta keteıik, búgin elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) men elimizdiń aýyl sharýashylyǵy mınıstrliginiń uıytqy bolýymen azyq-túlik júıelerin qaıta qurý boıynsha áleýmettik jobalardy talqylaýǵa arnalǵan dóńgelek ústel ótip jatyr.