Aýyl sharýashylyǵy ónimderi kólemi 13,7%-ǵa artty – vıtse-mınıstr

ASTANA. KAZINFORM — Byltyr aýyl sharýashylyǵy úshin sońǵy 10 jyldaǵy rekordtyq maýsym boldy. Salanyń jalpy ónim kólemi 13,7%-ǵa ósip, 8,3 mlrd teńgege jetti.

— Búginde agroónerkásiptik keshen elimizdiń azyq-túlik qaýipsizdigin qamtamasyz etetin ekonomıkanyń turaqty damyp kele jatqan sektorlarynyń biri. Byltyr aýyl sharýashylyǵy úshin sońǵy 10 jyldaǵy rekordtyq jyl boldy. Salanyń jalpy ónim kólemi 13,7%-ǵa ósip, 8,3 mlrd teńgege jetti. Bul barlyq ekonomıka salasy boıynsha eń joǵary ındeks ósimi. Bul kórsetkishke ósimdik sharýashylyǵyndaǵy óndiris kóleminiń 21,1%-ǵa, mal sharýashylyǵyndaǵy óndiris kóleminiń 3,6%-ǵa artýynyń nátıjesinde qol jetkizildi, — dedi Aýyl sharýalyǵy vıtse-mınıstri Ermek Kenjehanuly dóńgelek ústel barysynda.

Vıtse-mınıstrdiń aıtýynsha, byltyr elimizde 26,8 mln tonna astyq jınaldy, onyń ishinde 18,5 mln tonna bıdaı bar.

— Sonymen qatar, byltyr 2,6 mln tonna kartop, 3,8 mln tonna kókónis, 3,3 mln tonna maıly daqyldar jáne 302 myń tonna maqta jınaldy. Sondaı-aq, sońǵy 30 jyldaǵy rekordtyq 535,2 ts/ga ónimdilikpen 1,3 mln tonna qant qyzylshasy jınaldy (buryn 379 ts/ga aspaǵan). Ótken jyldyń joǵary kórsetkishterine aýyl sharýashylyǵy óndirýshileriniń agrotehnologııalardy qoldanýymen qatar qarjylyq jáne materıaldyq-tehnıkalyq bazany qamtamasyz etý boıynsha jasalǵan jumystyń esebinen qol jetkizildi, — deıdi ol.

Aıta keteıik, búgin elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) men elimizdiń aýyl sharýashylyǵy mınıstrliginiń uıytqy bolýymen azyq-túlik júıelerin qaıta qurý boıynsha áleýmettik jobalardy talqylaýǵa arnalǵan dóńgelek ústel ótip jatyr. 

Eske sala ketsek, jyl aıaǵyna deıin aýyl sharýashylyǵyna jaramdy jerlerdiń tsıfrlyq kartasy ázirlenedi.