Aýyl sharýashylyǵy mınıstrliginde sý tasqynynan qyrylǵan mal sany týraly málimet joq
ASTANA. KAZINFORM – QR Aýyl sharýashylyǵy mınıstrligi sý tasqynynan zardap shekken mal sanyn shamalap bolsyn aıta almaı otyr.
Mınıstrlik jergilikti atqarýshy organdar búlingen múlikke qatysty ótinishterdi qabyldap, keıin tıisti esep júrgizetinin atap ótti.
Mal shyǵynyn ornyn toltyrý máselesine kelsek, Aýyl sharýashylyǵy mınıstrligi keltirilgen shyǵyndy óteý máselesin ákimdikterge nemese sý tasqynyna qarsy is-qımyl jónindegi respýblıkalyq shtabqa joldaý kerek ekenin aıtty.
Aıta keteıik, buǵan deıin Qaraǵandy oblysynyń Shet aýdanynda birneshe aýylda sý tasqynynan 10 bas iri qara, 72 bas usaq mal jáne toǵyz jylqy ólgeni habarlanǵan bolatyn.
Al Aqtóbe oblysynda iri qaranyń ólý kórsetkishi úsh myńǵa jetti. Jergilikti ákimdikter áli kúnge deıin esep júrgizýde, dese de shalǵaı ornalasqan sharýa qojalyqtaryna qatynaý múmkin bolmaı tur.
Aýyl sharýashylyǵy mınıstrligi sý basqan óńirlerde maldyń qyrylýynyń aldyn alý maqsatynda olardy qaýipsiz jaıylymdyq aımaqtarǵa ornalastyrý jumystary uıymdastyrylǵanyn habarlady. Osylaısha, jedel derekter boıynsha 30 myńǵa jýyq tórt túlik qaýipsiz jerge jetkizilgen.
Vedomstvonyń habarlaýynsha, sý tasqyny saldarynan tótenshe jaǵdaı kezinde mal qyrylǵan jaǵdaıda jergilikti bıýdjetterden, sondaı-aq basqa da kózderden ótemaqy tólenedi.
