Aýyl sharýashylyǵy mınıstrligi nan baǵasy týraly: Dúrbeleńge salynýǵa sebep joq
ASTANA. KAZINFORM — Elimizdiń keı óńirlerinde qurǵaqshylyq baıqalyp, egin az ónim berýi múmkin bolsa da, nan baǵasy óspeıdi. Bul jóninde aýyl sharýashylyǵy vıtse-mınıstri Azat Sultanov Úkimet otyrysynan keıingi brıfıngte málimdedi.
— Sharýalardyń «ónimdi jyl» degen uǵymǵa qatysty kózqarasy basqasha. Egin mol ónim berse, biz «jaqsy jyl» deımiz. Al olar ónimdi az alsa, jaqsy jyl boldy dep esepteıdi. Sebebi, az shyqsa, ónim baǵasy qymbat bolady. Ol áleýmettik mańyzy bar taýarlar óndirisiniń ózindik qunyna da áser etedi, — dedi ol.
Vıtse-mınıstrdiń sózinshe, bıdaı quny aıtarlyqtaı ózgergen kezderde de nan baǵasy qymbattamaǵan.
— Tórt jyl buryn bıdaıdyń tonnasy 180 myń teńge boldy. Qazir ol 90 myń teńge shamasynda. Sodan beri nannyń baǵasy 110 teńgeden ózgergen joq. Memleket osy baǵany saqtaý úshin barlyq qajetti is-sharany atqaryp jatyr, — dedi ol.
Bul másele boıynsha alańdaýǵa negiz joq ekenin de atap ótti.
— Nansyz qalamyz nemese nannyń baǵasy qymbattaıdy dep qaýiptenýge áli erte. Bul jaıtqa qatysty dúrbeleńge salynýǵa bolmaıdy. Alda-jalda oılamaǵan jaǵdaılar oryn alyp jatsa, memleket baǵany ustap turý boıynsha kerekti sharalardy qabyldaıdy. Bizdińshe, qazirgi ahýalda ýaıymdaýǵa sebep joq, — dep túıindedi vıtse-mınıstr.
Aıta keteıik, buǵan deıin Aýyl sharýashylyǵy mınıstrligi qant baǵasynyń kúrt ózgerý sebebin túsindirgenin jazǵanbyz.
