Aýyl sharýashylyǵy mınıstrligi qarbyzdy shilde aıynyń sońynan bastap satyp alýǵa keńes berdi
ASTANA. KAZINFORM – Qarbyz ben ózge de baqsha ónimderin shilde aıynyń sońy men qyrkúıek aıy aralyǵynda jegen jón. Bul týraly Úkimettegi brıfıng barysynda jýrnalısterdiń saýalyna jaýap bergen Aýyl sharýashylyǵy vıtse-mınıstri Azat Sultanov málimdedi.
Onyń aıtýynsha, baqsha ónimderiniń pisý merzimi ósirý tehnologııasyna baılanysty.
– Baqsha ónimderin ósirýdiń tórt tehnologııasy bar. Birinshisi – úldirdiń astynda ósiriletin ónimder, ekinshisi – orta merzimde, úshinshisi – kesh pisetin, tórtinshisi – jyl boıy ósiriletin daqyldar. Baqsha ónimderin shilde aıynyń sońy men qyrkúıek aıy aralyǵynda tutynǵan qaýipsiz. Sebebi osy kezeńde olar eshqandaı qospasyz, tyńaıtqyshsyz tabıǵı jolmen pisedi, – dedi Azat Sultanov.
Vıtse-mınıstr bul usynysty ásirese balalarǵa qarbyz satyp alarda eskerýge keńes berdi.
Sondaı-aq ol shetelden ákelinetin jemis-jıdek pen kókónisterdiń fıtosanıtarııalyq baqylaýdan ótetinin atap ótti.
Aıta keteıik, Azat Sultanov qant baǵasynyń kúrt ózgerý sebebin de túsindirdi.
