Aýyl sharýashylyǵy mınıstrligi qant baǵasynyń kúrt ózgerý sebebin túsindirdi
ASTANA. KAZINFORM – Elimizdiń birqatar óńirinde qant baǵasynyń kúrt ósýi maýsymdyq suranystyń artýymen baılanysty. Bul týraly Úkimettegi brıfıng barysynda jýrnalısterdiń saýalyna jaýap bergen Aýyl sharýashylyǵy vıtse-mınıstri Azat Sultanov málimdedi.
– Keıbir óńirlerde túıirshiktelgen qant baǵasynyń ósýi maýsymdyq kezeńmen baılanysty. Bul ýaqytta turǵyndar kompot, tosap jáne ózge de qysqy azyq-túlik qoryn daıyndaı bastaıdy. Sonyń saldarynan qantqa suranys artady, – dedi vıtse-mınıstr.
Onyń aıtýynsha, aldaǵy ýaqytta qant baǵasynyń aıtarlyqtaı qymbattaýyna negiz joq.
— Bıyl qant qyzylshasynan mol ónim kútiledi. Qazir elimizde qant qyzylshasyn óńdeıtin úsh zaýyt jumys istep tur. Sonymen qatar, bıyl «Taraz qant» zaýytynda qant qyzylshasyn óńdeıtin jańa óndiris iske qosylady. Sonyń nátıjesinde jınalǵan ónim tolyq óńdeledi, – dedi Azat Sultanov.
Vıtse-mınıstrdiń aıtýynsha, qanttyń bir bóligi Latyn Amerıkasy elderinen ákelinetin qant shıkizatynan óndiriledi. Al elge ımporttalatyn qanttyń basym bóligi Reseıden jetkiziledi.
Sondaı-aq Aýyl sharýashylyǵy mınıstrligi elimizde qant qory jetkilikti ekenin málimdedi.
Azat Sultanovtyń aıtýynsha, óńirlik turaqtandyrý qorlarynda qanttyń jetkilikti qory qalyptasǵan.
– Eger naryqta baǵa qubylsa, bul qorlardaǵy qant satylymǵa shyǵarylady. Osylaısha baǵanyń ósýin tejeýge múmkindik bolady. Qant tapshylyǵyna alańdaýǵa negiz joq. Qazirgi tańda qoımalarda elimizdiń qajettiligin úsh aı boıy qamtamasyz etýge jetetin qor bar, – dedi vıtse-mınıstr.
Aıta keteıik, jaqynda Prezıdent Aýyl sharýashylyǵy mınıstrine azyq-túlik qaýipsizdigin nyǵaıtýdy tapsyrdy
